Retail Inflation Data For June 2023 : ચાર મહિના સુધી સતત ઘટાડા બાદ ફુગાવાના દરના આંકડાએ ફરી એકવાર યુ-ટર્ન લીધો છે. જૂન 2023માં ખાદ્ય ચીજવસ્તુઓના ભાવમાં તીવ્ર ઉછાળાને કારણે છૂટક ફુગાવાના દરમાં ફરીથી વધારો થયો છે. જૂન મહિનામાં રિટેલ મોંઘવારી દર 4.81 ટકા હતો જ્યારે મે 2023માં રિટેલ મોંઘવારી દર 4.31 ટકા હતો.


મોંઘી ખાદ્ય વસ્તુઓ


આંકડા મંત્રાલય દ્વારા જાહેર કરવામાં આવેલા આંકડા મુજબ ખાદ્ય ચીજવસ્તુઓના મોંઘવારી દરમાં ભારે વધારો થયો છે. ખાદ્ય ફુગાવો જૂનમાં વધીને 4.49 ટકા થયો છે, જે મે 2023માં 2.96 ટકા હતો. જૂન 2022માં ખાદ્ય ફુગાવાનો દર 7.75 હતો.


દાળ અને શાકભાજી મોંઘા થયા 


જૂન મહિનામાં મોંઘવારી દરમાં વધારો થવાનું મુખ્ય કારણ અરહર અને અન્ય કઠોળના ભાવ છે. કઠોળનો ફુગાવો જૂનમાં 10.53 ટકા હતો, જ્યારે મે મહિનામાં તે 6.56 ટકા હતો. લીલોતરી અને શાકભાજીનો ફુગાવાનો દર જૂનમાં -0.93 ટકા રહ્યો છે. જ્યારે મે મહિનામાં તે -8.18 ટકા હતો. મસાલાનો ફુગાવો મે મહિનામાં 17.90 ટકાથી વધીને 19.19 ટકા થયો છે. દૂધ અને તેના સંલગ્ન ઉત્પાદનોના ભાવ મે મહિનામાં 8.91 ટકાની સરખામણીએ હજુ પણ 8.56 ટકા પર રહ્યા છે. ખાદ્ય અનાજ અને સંબંધિત ઉત્પાદનોનો ફુગાવાનો દર 12.71 ટકા રહ્યો, જે મે મહિનામાં 12.65 ટકા હતો. જો કે, તેલ અને ચરબીનો ફુગાવાનો દર ઘટીને -18.12 ટકા થયો હતો, જે મે મહિનામાં -16.01 ટકા હતો. ખાંડનો મોંઘવારી દર 3 ટકા હતો, જે ગયા મહિને 2.51 ટકા હતો.


સસ્તી લોનની આશાને આંચકો!


જૂનમાં છૂટક મોંઘવારી દરનો આંકડો 4.81 ટકા છે એટલે કે આરબીઆઈનો સહનશીલતા બેન્ડ 2 થી 6 ટકાની વચ્ચે છે. પરંતુ આ વર્ષે દેશના અનેક રાજ્યોમાં ભારે વરસાદને કારણે ખરીફ પાક અને શાકભાજીના ઉત્પાદન પર ખરાબ અસર થવાની સંભાવના છે. અલ નિનોનો ખતરો છે. આ સ્થિતિમાં મોંઘવારી વધવાનો ભય છે. આરબીઆઈના ગવર્નર શક્તિકાંત દાસે પોતે કહ્યું છે કે, મોંઘવારી સામેની લડાઈ હજુ પૂરી થઈ નથી. આ સ્થિતિમાં 10 ઓગસ્ટ, 2023ના રોજ, વ્યાજ દરો અથવા પોલિસી રેટ્સમાં ઘટાડા સામે આરબીઆઈ તરફથી રાહતની આશાઓ પર પાણી ફરી શકે છે.


ઉલ્લેખનીય છે કે, છેલ્લા કેટલાક સમયથી ટામેટા લાલઘુમ થયા છે. દેશમાં ટામેટા 200 રૂપિયાથી પણ વધુના ભાવે કિલો વેચાઈ રહ્યાં છે. રાજધાની દિલ્હી સહિતની કેટલીક જગ્યાઓએ તો ટામેટાનો કિલોનો ભાવ 260 રૂપિયાને વટાવી ગયા છે. જેની આ આંકડાઓ પર ભારે અસર થઈ છે. 


https://t.me/abpasmitaofficial