GST on Fancy Number Plates: વાહનોમાં મનપસંદ નંબર પ્લેટ લગાવવાનો શોખ આગામી દિવસોમાં વધુ મોંઘો પડી શકે છે. સરકાર ભારતમાં ફેન્સી નંબર પ્લેટ પર GST વસૂલવાની તૈયારી કરી રહી છે. સરકાર ફેન્સી નંબર પ્લેટ પર સૌથી વધુ GST એટલે કે 28 ટકા લાદવાની યોજના ધરાવે છે.
શું ફેન્સી નંબર અથવા પસંદગીના નંબરને લક્ઝરી આઇટમ તરીકે ગણી શકાય?
CNBC TV18ના એક અહેવાલ મુજબ, વાહનોમાં પસંદગીની નંબર પ્લેટ લગાવવા પર GST વસૂલવાનો પ્રસ્તાવ હમણાં જ નાણાં મંત્રાલયને મોકલવામાં આવ્યો છે. પ્રસ્તાવમાં નાણા મંત્રાલયને પૂછવામાં આવ્યું છે કે શું ફેન્સી નંબર અથવા પસંદગીના નંબરને લક્ઝરી આઇટમ તરીકે ગણી શકાય અને તેના પર સૌથી વધુ 28 ટકાના દરે GST વસૂલ કરી શકાય?
ફિલ્ડ ફોર્મેશન્સે આ ભલામણ કરી હતી
સૂત્રોના જણાવ્યા અનુસાર, ફિલ્ડ ફોર્મેશન્સે સેન્ટ્રલ બોર્ડ ઓફ ઇનડાયરેક્ટ ટેક્સિસ એન્ડ કસ્ટમ્સ (CBIC) ને એક પત્ર લખીને દેશમાં આવા ફેન્સી નંબરો પર GST ચૂકવવાપાત્ર છે કે કેમ તે સ્પષ્ટ કરવા જણાવ્યું છે. ફિલ્ડ ફોર્મેશન્સ માને છે કે ફેન્સી નંબર પ્લેટ એ લક્ઝરી વસ્તુઓ છે અને તેથી તેના પર 28 ટકાના દરે GST ચૂકવવાપાત્ર છે.
ફેન્સી નંબરની હરાજી લાખોમાં થાય છે
વાહનોને નંબર પ્લેટ અથવા રજીસ્ટ્રેશન પ્લેટ આપવાનું કામ રાજ્ય સરકાર દ્વારા કરવામાં આવે છે. રાજ્ય સરકારો ફેન્સી નંબર આપવા માટે હરાજી કરે છે, જેના માટે અલગથી ફી ચૂકવવી પડે છે. ઘણી વખત ફેન્સી નંબરની લાખો રૂપિયામાં હરાજી થાય છે અને લોકો પોતાના વાહનોમાં ફેન્સી નંબર લગાવવા માટે લાખો રૂપિયાનો ખર્ચ પણ કરે છે.
ફિલ્ડ ફોર્મેશન્સ શું છે?
ફિલ્ડ ફોર્મેશન્સે એ તમામ રાજ્યો અને ઝોનમાં સ્થિત કેન્દ્ર સરકારની કચેરીઓ છે, જે કર વસૂલાત માટે જવાબદાર છે. કર વસૂલાત ઉપરાંત, ફિલ્ડ ફોર્મેશન્સ કર સંબંધિત નિયમોને લાગુ કરવાની અને કરદાતાઓ સાથે વાતચીત કરવાની જવાબદારી પણ ધરાવે છે. જો ફિલ્ડ ફોર્મેશન સ્વીકારવામાં આવે તો ફેન્સી નંબર પર લોકોનો ખર્ચ ટૂંક સમયમાં વધશે. તમને જણાવી દઈએ કે, પસંદગીના નંબરો માટે માત્ર ભારતમાં જ નહીં વિદેશમાં પણ લોકો મોટી રકમ ચૂકવે છે. ઘણા કિસ્સામાં સામે આવ્યું છે કે, કારની મૂળ કિંમત કરતા નંબરની રકમ વધી ગઈ હોય.