Gold and Silver: નાણા પ્રધાન નિર્મલા સીતારમણના બજેટ 2024 રજૂ થયા પછી સોના અને ચાંદીના ભાવમાં મોટો ઘટાડો થયો હતો. જેના કારણે સોનું ખરીદવા માંગતા લોકોને લાગ્યું હતું કે હવે ગોલ્ડ ખરીદવાનો યોગ્ય સમય છે. પરંતુ થોડા દિવસો બાદ સોનાએ ફરી લાંબી છલાંગ લગાવી હતી. મંગળવારે સોનાએ રેકોર્ડબ્રેક ઉછાળો માર્યો હતો અને એક જ દિવસમાં 1400 રૂપિયાનો વધારો થયો હતો. સોનામાં એક મહિનામાં સૌથી વધુ વધારો નોંધાયો છે. ચાંદીના ભાવમાં પણ 3100 રૂપિયાનો જંગી વધારો નોંધાયો છે.
સોનાના ભાવમાં 1400 અને ચાંદીમાં 3150નો વધારો થયો
વૈશ્વિક માંગને કારણે મંગળવારે રાષ્ટ્રીય રાજધાની દિલ્હીના બુલિયન માર્કેટમાં સોનાની કિંમત 1400 રૂપિયા વધીને 74,150 રૂપિયા પ્રતિ 10 ગ્રામ પર પહોંચી ગઈ છે. શુક્રવારે છેલ્લા ટ્રેડિંગ સેશનમાં સોનું 72,750 રૂપિયા પ્રતિ 10 ગ્રામ પર બંધ થયું હતું. ચાંદીનો ભાવ પણ 3,150 વધીને 87,150 રૂપિયા પ્રતિ કિલોએ બંધ રહ્યો હતો, જ્યારે તેનો અગાઉનો બંધ ભાવ 84,000 પ્રતિ કિલો હતો.
ઈમ્પોર્ટ ડ્યુટીમાં ઘટાડો કરવાની જાહેરાત બાદ કિંમતો સતત ઘટી રહી હતી
નાણાંકીય વર્ષ 2024-25ના બજેટમાં નાણામંત્રી નિર્મલા સીતારમણ દ્વારા સોના પરની આયાત ડ્યૂટી ઘટાડવાની જાહેરાત બાદ ગોલ્ડની કિંમતો સતત ઘટી રહી હતી. 23 જૂલાઈએ સોનાની કિંમત 3,350 રૂપિયા ઘટીને 72,300 રૂપિયા પ્રતિ 10 ગ્રામ થઈ ગઈ હતી. દરમિયાન દિલ્હીમાં, 99.9 ટકા અને 99.5 ટકા શુદ્ધતાનું સોનું તેના અગાઉના બંધ ભાવની સરખામણીએ 1,400 રૂપિયા વધીને 74,150 અને 73,800 રૂપિયા પ્રતિ 10 ગ્રામ પર બંધ થયું હતું.
જ્વેલર્સની વધતી જતી માંગને કારણે વધારો જોવા મળી રહ્યો છે.
સ્થાનિક જ્વેલર્સની વધતી માંગ સાથે વૈશ્વિક મજબૂત વલણને કારણે સોનાના ભાવમાં વધારો થવાનું કારણ વેપારીઓએ જણાવ્યું હતું. વૈશ્વિક સ્તરે સોનું 18.80 ડોલર પ્રતિ ઔંસ વધીને 2,560.10 ડોલર પ્રતિ ઔંસ પર ટ્રેડ કરી રહ્યું હતું. આંતરરાષ્ટ્રીય બજારમાં ચાંદીની કિંમત પણ વધીને 30.19 ડોલર પ્રતિ ઔંસ થઈ ગઈ છે.
આ પણ વાંચોઃ
હવે એકાઉન્ટ વગર થશે પેમેન્ટ, UPIમાં થયો આ મોટો ફેરફાર, માત્ર આ લોકોને મળવાનો છે લાભ