નવી દિલ્હીઃ વૈશ્વિક બજારમાં અસ્થિરતાને કારણે શુક્રવારે ભારતીય બજારમાં સોના અને ચાંદીના ભાવમાં ઘટાડો જોવા મળ્યો હતો.જો કે સોનાનો ભાવ હજુ પણ 51 હજારની ઉપર યથાવત છે.
મલ્ટિકોમોડિટી એક્સચેન્જ (MCX) પર સવારે 9.10 વાગ્યે, 24 કેરેટ શુદ્ધતાના વાયદાના ભાવ રૂ. 1 ઘટીને રૂ. 51,584 પ્રતિ 10 ગ્રામ થયા હતા. આજે બજારમાં સોનાનો ભાવ એ જ ભાવે ખૂલ્યો હતો અને લાંબા સમય સુધી સ્થિર રહ્યો હતો. નોંધપાત્ર વાત એ છે કે, કોરોના મહામારી દરમિયાન સોનાનો ભાવ રેકોર્ડ સ્તરે પહોંચી ગયો હતો. 2020માં 10 ગ્રામ સોનાનો ભાવ 55,700 રૂપિયાની આસપાસ હતો.
ચાંદીમાં પણ ઘટાડો થયો પરંતુ ભાવ 67 હજારની ઉપર
શુક્રવારે, એમસીએક્સ પર ચાંદીના વાયદાના ભાવમાં ઘટાડો જોવા મળ્યો હતો, પરંતુ તેનો દર હજુ પણ 67 હજારની ઉપર યથાવત છે. સવારે 9.10 વાગ્યે ચાંદીનો વાયદો રૂ. 222 ઘટીને રૂ. 67,265 પ્રતિ કિલોગ્રામ હતો. જોકે, અત્યારે પણ ચાંદી તેના રેકોર્ડ સ્તરથી લગભગ રૂ. 6,000 સસ્તી વેચાઈ રહી છે. MCX પર આજે ચાંદીનો ભાવ 67,374 પર ખૂલ્યો હતો, જે ઘટીને 67,265 થયો હતો.
વૈશ્વિક બજારમાં અસ્થિરતા
વૈશ્વિક બજારમાં આજે સોનાના ભાવમાં વધારો જોવા મળ્યો હતો જ્યારે ચાંદીના ભાવમાં ઘટાડો જોવા મળ્યો હતો. વૈશ્વિક બજારમાં સોનાનો હાજર ભાવ સવારે 0.10 ટકા વધીને 1,938.85 ડોલર પ્રતિ ઔંસ થયો હતો. જોકે, ચાંદીના ભાવમાં 0.48 ટકાનો ઘટાડો નોંધાયો છે અને 25 ડોલર પ્રતિ ઔંસની આસપાસ રહે છે. એક દિવસ અગાઉ વૈશ્વિક બજારમાં સોના અને ચાંદી બંનેના ભાવમાં ઉછાળો જોવા મળ્યો હતો.
સોનું ક્યારે સસ્તું થશે
નિષ્ણાતો કહે છે કે રશિયા અને યુક્રેન વચ્ચે યુદ્ધ સમાપ્ત થયા પછી સોનાના માગ ઘટશે અને ભાવ પણ નીચે આવી શકે છે. એવો અંદાજ છે કે આગામી 50 દિવસમાં વૈશ્વિક બજારમાં સોનાની હાજર કિંમત 1,892 ડોલર પ્રતિ ઔંસ સુધી જઈ શકે છે. ચાંદી પણ 24 ડોલર પ્રતિ ઔંસ આસપાસ રહેવાનો અંદાજ છે. ભારતીય બજારમાં ચાંદી રૂ. 66,550ની આસપાસ ટ્રેડ થવાનો અંદાજ છે, જ્યારે સોનું રૂ. 50,550 સુધી સસ્તું થઈ શકે છે.