Bank employees: બેન્ક કર્મચારીઓ માટે મોટા સમાચાર આવ્યા છે. તેમના મોંઘવારી ભથ્થામાં જંગી વધારાની જાહેરાત કરવામાં આવી છે. ઈન્ડિયન બેન્ક એસોસિએશન (IBA) તરફથી બેન્ક કર્મચારીઓ અને અધિકારીઓને મે, જૂન અને જુલાઈ મહિના માટે 15.97 ટકાના દરે DA મળશે. IBAએ આ અંગે એક પરિપત્ર જાહેર કરીને માહિતી શેર કરી છે. મતલબ કે આ મહિનામાં પગારમાં બમ્પર વધારો થશે.
તમને ત્રણ મહિના માટે આટલું ડીએ મળશે
ઇન્ડિયન બેન્ક એસોસિએશન (IBA) એ તેના સર્ક્યુલરમાં જણાવ્યું છે કે બેન્ક કર્મચારીઓના DAમાં વધારાની જાહેરાત કરવામાં આવી છે. મે, જૂન અને જુલાઈ 2024 માટે બેન્ક કર્મચારીઓ અને અધિકારીઓનું મોંઘવારી ભથ્થું તેમના પગારના 15.97 ટકા હશે. આ સાથે પરિપત્રમાં કહેવામાં આવ્યું છે કે 08 માર્ચ 2024ના રોજ થયેલા 12મા દ્વિપક્ષીય કરારના ક્લોઝ 13 અને સંયુક્ત નોંધના ક્લોઝ 2 (i) મુજબ મોંઘવારી ભથ્થામાં વધારો કરવામાં આવ્યો છે.
આ છે મોંઘવારી ભથ્થાની સંપૂર્ણ ગણતરી
IBA મુજબ, CPI 2016 માં 123.03 પોઈન્ટ પર દરેક બીજા દશાંશ સ્થાનમાં ફેરફાર માટે પગાર પર DAમાં 0.01 ટકાનો ફેરફાર કરવામાં આવે છે. તેના આધારે મે, જૂન અને જુલાઈ 2024 માટે બેન્ક કર્મચારીઓ અને અધિકારીઓના ડીએમાં વધારો કરવાનો નિર્ણય લેવામાં આવ્યો છે.
અઠવાડિયામાં 5 દિવસ કામ કરવાની પણ માંગ
બેન્ક કર્મચારીઓને ડીએ વધારાની ભેટ મળી છે, પરંતુ તેમની વધુ એક માંગનો નિર્ણય લેવાનો બાકી છે અને તે લાંબા સમયથી પેન્ડિંગ છે. વાસ્તવમાં બેન્ક કર્મચારીઓ લાંબા સમયથી 5 દિવસના વર્ક વીકની માંગ કરી રહ્યા છે. ઈન્ડિયન બેન્ક એસોસિએશન અને બેન્ક યુનિયનો આ પ્રસ્તાવ માટે સહમત થઈ ચૂક્યા છે, પરંતુ આ પ્રસ્તાવ પર હજુ સરકારની મંજૂરીની રાહ જોવામાં આવી રહી છે
IBA અને બેન્ક યુનિયનો વચ્ચે કરાર પર હસ્તાક્ષર થયા
આ વર્ષે માર્ચ મહિનામાં કરવામાં આવેલી સંયુક્ત જાહેરાતમાં કહેવામાં આવ્યું હતું કે IBA અને બેન્ક યુનિયનો વચ્ચેનો આ કરાર PSU બેન્કના કર્મચારીઓ માટે અઠવાડિયામાં 5 દિવસ કામ કરવાનું સરળ બનાવવામાં મહત્વની ભૂમિકા ભજવશે. ભારતીય રિઝર્વ બેન્કે (RBI) બેન્કો માટે ન્યૂનતમ કામના કલાકો અને ગ્રાહક સેવા સમય મર્યાદા નક્કી કરી છે, જેનું પાલન કરવું ફરજિયાત છે.