lpg connection rules 2026: જો તમારા ઘરમાં પણ રસોઈ માટે LPG ગેસ સિલિન્ડરનો ઉપયોગ થાય છે, તો આ સમાચાર તમારા માટે ખૂબ જ મહત્વના છે. કેન્દ્ર સરકારના પેટ્રોલિયમ અને કુદરતી ગેસ મંત્રાલય દ્વારા ગેસ કનેક્શન અંગે જારી કરાયેલા નવા નિયમોની 90 દિવસની ડેડલાઇન 22 જૂને પૂરી થઈ રહી છે. જે વિસ્તારોમાં પાઇપલાઇન નેચરલ ગેસ (PNG) ની સુવિધા પહોંચી ગઈ છે ત્યાં નિયમોનું પાલન ન કરનારા ગ્રાહકોનો LPG સપ્લાય બંધ કરવામાં આવી રહ્યો છે. જો તમે સરકારી ગાઇડલાઇનનું પાલન નહીં કરો અથવા તમારું KYC અપડેટ નહીં કરો, તો કાલથી તમારું ગેસ સિલિન્ડર બુકિંગ અટકી શકે છે.
શા માટે લેવાયો આ નિર્ણય અને કોનો ગેસ કપાશે?
હકીકતમાં, દેશના એનર્જી ઇમ્પોર્ટ બિલ (ઉર્જા આયાત ખર્ચ) પરનું ભારણ ઘટાડવા માટે સરકારે આ મોટો નિર્ણય લીધો છે. સરકારનો આગ્રહ છે કે લોકો પાઇપવાળા ગેસનો વધુ ઉપયોગ કરે. નવા નિયમ મુજબ, જે ઘરોમાં અથવા જેમની સોસાયટીની નજીક PNG ની પાઇપલાઇન પહોંચી ગઈ છે, તેમના LPG કનેક્શન રદ કરવામાં આવશે. આ ઉપરાંત, જો એક જ ઘરમાં બે ગેસ કનેક્શન હશે તો પરિવારને માત્ર એક જ કનેક્શન રાખવા મળશે, બીજું કનેક્શન જમા કરાવવું પડશે. આટલું જ નહીં, જો કોઈ ગ્રાહકે હજુ સુધી પોતાના ગેસ કનેક્શન માટે ફરજિયાત KYC પ્રક્રિયા પૂરી નથી કરી, તો તેમનો ગેસ સપ્લાય પણ તાત્કાલિક અટકાવી દેવામાં આવશે.
ગેસ સપ્લાય કપાતો બચાવવા તાત્કાલિક શું કરવું જોઈએ?
જો તમારે કાલથી ગેસ બુકિંગમાં કોઈ અડચણ ન જોઈતી હોય તો અમુક વાતોનું ખાસ ધ્યાન રાખો. સૌથી પહેલા તો એ તપાસી લો કે તમારી સિટી ગેસ ડિસ્ટ્રિબ્યુશન (CGD) કંપનીએ તમારા વિસ્તારમાં ગેસની પાઇપલાઇન નાખી છે કે નહીં.
જો પાઇપલાઇન આવી ગઈ હોય તો તરત જ ઓનલાઇન અથવા સ્થાનિક પોર્ટલ પર જઈને PNG માટે અરજી કરી દો.
જો કોઈ ટેકનિકલ કારણસર (જેમ કે મકાનની રચના) તમારા ઘરમાં પાઇપલાઇન પહોંચાડવી ભૌતિક રીતે શક્ય ન હોય, તો તમારું કનેક્શન કપાઈ ન જાય તે માટે ગેસ કંપની પાસેથી 'ટેકનિકલ NOC' (ના વાંધા પ્રમાણપત્ર) મેળવી લો.
આ પણ વાંચોઃ ગેસ સિલિન્ડર પર લખેલા C-21 કે A-24 જેવા કોડનો અર્થ જાણો છો? નજરઅંદાજ કરવું જોખમી છે
આ સાથે જ, તાત્કાલિક તમારી ગેસ એજન્સી પર જઈને તમારું આઈડી કાર્ડ અને એડ્રેસ પ્રૂફ જમા કરાવી KYC કરાવી લો. તમે મકાન માલિક હોવ કે ભાડૂઆત, આ પ્રક્રિયા ફરજિયાત છે.
સ્થળાંતર કરીને આવેલા લોકોએ એટલે કે ભાડૂઆતોએ બ્લેકલિસ્ટ થવાથી બચવા પોતાનું સેલ્ફ-ડિક્લેરેશન (સ્વ-ઘોષણા) ફોર્મ રજિસ્ટર કરાવી દેવું જોઈએ.
છેલ્લે, એ ખાસ ખાતરી કરી લો કે ડિસ્ટ્રીબ્યુટર પાસે તમારો ચાલુ મોબાઈલ નંબર જ રજિસ્ટર્ડ છે અને ડિલિવરી ઓથેન્ટિકેશન કોડ (DAC) સિસ્ટમ હેઠળ તમારું કનેક્શન વેરિફાઈ થયેલું છે. આ સિસ્ટમનો અમલ ગેસ વિતરણમાં થતી ગેરરીતિઓ અટકાવવા માટે 90 ટકા સુધી વધારી દેવામાં આવ્યો છે. આજે જ આ કામ પતાવી લેશો તો આવતીકાલથી તમારે ગેસ વગર હેરાન થવાનો વારો નહીં આવે.
આ પણ વાંચોઃ LPG ગેસ સપ્લાય બંધ થઈ જશે? e-KYCના નવા નિયમો અંગે સરકારે કરી મોટી સ્પષ્ટતા