અનિલ અંબાણીના વકીલે બ્રિટનની કોર્ટમાં કહ્યું કે, અનિલ અંબાણી એક સમયે ધનાઢ્ય હતા, પરંતુ હવે નથી. ચીનની એક અગ્રણી બેંક દ્વારા 68 કરોડ ડોલર (અંદાજે 4700 કરોડ રૂપિયા)ના દાવા પર સુનાવણી દરમિયાન વકીલે કોર્ટને કહ્યું કે, ભારતના ટેલીકોમ ઉદ્યોગમાં ઉથલ પુથલ થવાને કારણે અનિલ અંબાણીને ભારે નુકસાન ઉઠાવવું પડ્યું છે.
ચીનની ત્રણ બેંકોએ અનિલ અંબાણીની સામે 680 મિલિયન ડોલર (લગભગ 4,760 કરોડ) રૂપિયાની લોન ન ચૂકવવા મામલે લંડનની કોર્ટમાં કેસ કર્યો છે. ત્રણે બેંકોએ અનિલ અંબાણીની કંપની રિલાયન્સ કોમ્યુનિકેશનને 925.20 મિલિયન ડોલર (લગભગ 6,475 કરોડ રૂપિય)ની લોન આપી હતી. એ સમયે અનિલ અંબાણીએ કહ્યું હતું કે, તેઓ આ લોનની પર્સનલ ગેરંટી આપે છે, પરંતુ ફેબ્રુઆરી 2017 પછી કંપની લોન ચૂકવવામાં ડિફોલ્ટ થઈ ગઈ.
આ મામલે અનિલ અંબાણીનું કહેવું છે કે, તેમણે પર્સનલ કન્ફર્ટ લેટર આપવાની વાત કરી હતી, પરંતુ અંગત સંપત્તિને ગેરંટી બનાવવાની વાત ક્યારેય નથી કરી.