મધ્યપ્રદેશમાં ભારે વરસાદ પડી રહ્યો છે. જેના કારણે કેવડિયા કોલોની સ્થિત સરદાર સરોવર નર્મદા ડેમમાં પાણીની વિપુલ પ્રમાણમાં આવક થઈ છે. નર્મદા ડેમમાં હાલ ઉપરવાસમાંથી પાણી છોડાતા 46 હજાર 504 ક્યુસેક પાણીની આવક થઈ રહી છે. સતત પાણીની આવકના કારણે સરદાર સરોવર ડેમનું જળસ્તર પહોંચી ગયું છે 115.86 મીટર પર એટલે કે 8 કલાકમાં ડેમની જળસપાટીમાં 86 સેન્ટિમીટરનો વધારો થયો છે. જોકે હાલ ડેમની જળસપાટી છે તે ગત વર્ષ કરતા 5 મીટર ઓછી છે. ડેમમાં હાલ 4 હજાર 363 MCFT પાણીનો જથ્થો છે.


વરસાદ આગાહી


રાજ્યમાં આજે એટલે કે 26 જુલાઈના રોજ પણ સાર્વત્રિક ભારેથી અતિભારે વરસાદની આગાહી હવામાન વિભાગે કરી છે. રાજ્યના મોટા ભાગના જિલ્લામાં આજે ભારેથી અતિભારે વરસાદની હવામાન વિભાગે આગાહી કરી છે.


આજે મહીસાગર, છોટા ઉદેપુર, અરવલ્લી, પંચમહાલ, દાહોદ, બનાસકાંઠા, પાટણ, સાબરકાંઠા, ગાંધીનગર, અમદાવાદ, વડોદરા, નર્મદા, વલસાડ, રાજકોટ, જામનગર, પોરબંદર, જૂનાગઢ, ગીર સોમનાથ, મહેસાણા, ખેડા, ડાંગ, તાપી, નવસારી, અમરેલી, દ્વારકા અને દીવમાં આજે ભારેથી અતિભારે વરસાદ વરસી શકે છે. રાજ્યમાં અત્યાર સુધીમાં ચોમાસાની સિઝનનો 28 ટકા વરસાદ વરસી ચુક્યો છે.


જામનગર સાર્વત્રિક વરસાદ


જામનગર જિલ્લામાં રવિવારે સાર્વત્રિક વરસાદ વરસ્યો છે. જામનગર જિલ્લાના તમામ તાલુકામાં રવિવારે ધોધમાર વરસાદ વરસ્યો હતો. ધોધમાર વરસાદ વરસતા ચારેય તરફ જળબંબાકારની સ્થિતિ સર્જાય છે. તો સ્થાનિક નદીઓમાં પણ ઘોડાપુર આવ્યુ છે.


જામનગર જિલ્લાના કાલાવડના મુળિયા, લતિપુર, નપાણીયા, ખીજડીયા, ડેરી, નાના વડાળા, અને ગુંદા પંથકમાં નદી નાળા છલકાયા. તો અનેક ચેકડેમો પણ છલકાયા છે. ગામના માર્ગો પણ જાણે નદીઓ વહેતી હોય તેવા દ્રશ્યો સર્જાયા હતા. જામનગરના મુળીયા ગામમાં તો બે કલાકમાં અનરાધાર સાત ઈંચ વરસાદ વરસતા જળબંબાકારની સ્થિતિ સર્જાય છે. કાલાવડના છતર ગામે ભારે વરસાદમાં જેસીબી તણાયુ હતું. ધસમસતા પાણીમાં જેસીબી સાથે ડ્રાઈવર પણ તણાયો. જેનો વીડિયો સોશલ મીડિયામાં વાયરલ થયો છે.


જામજોધપુર તાલુકાના ધ્રાફા ગામમાં પણ ધોધમાર વરસાદથી ફુલઝર નદીમાં ઘોડાપુર આવ્યુ. તો સોગઠી ગામે પણ ભારે વરસાદથી નદીઓ બે કાંઠે વહેતી થઈ. નરમાણા ગામમાં જણ ધોધમાર વરસાદ વરસતા બજારોમાં નદીઓ વહેતી થઈ હોય તેવા દ્રશ્યો સર્જાયા હતા.


જિલ્લામાં સાર્વત્રિક ધોધમાર વરસાદથી ફુલઝર ડેમના સાત દરવાજા પાંચ ફુટ સુધી ખોલવામાં આવ્યા હતા. તો જામજોધપુર તાલુકાના સીદસર ગામ પાસે આવેલ ઉમિયા સાગર ડેમનું જળસ્તર જાળવવા માટે 10 દરવાજા પાંચ ફુટ ખોલવામાં આવ્યા હતા. તો પ્રશાસને પણ સ્થાનિકોને કાંઠા વિસ્તારમાં અવર જવર ન કરવા માટે સૂચના આપી હતી.


રાજકોટમાં સાર્વત્રિક વરસાદ


આ તરફ રાજકોટ જિલ્લામાં પણ રવિવારે સાર્વત્રિક વરસાદ વરસ્યો છે. રાજકોટ જિલ્લાના અલગ અલગ ગ્રામ્ય વિસ્તારોમાં ધોધમાર વરસાદ વરસ્યો. ધોધમાર વરસાદને લીધે રાજકોટ મોરબી હાઈવે પર જળબંબાકારની સ્થિતિ સર્જાઈ. પાણીના પ્રવાહની સાથે કેટલાક પશુઓ પણ તણાયા હોવાનો સરપંચે દાવો કર્યો છે. તો ધોધમાર વરસાદને પગલે ખેતરો પણ ધોવાયા હતા. નદીઓના પાણી પણ ગામમાં ઘુસી જતા લોકોના ઘરવખરીને નુકસાન થયું હતુ.


કાગદડી ગામ અને વાડી વિસ્તારમાં તો કેટલાક વીજપોલ પણ ધરાશાયી થતા હતા. તો લોધિકા તાલુકામાં સાત ઈંચથી વધુ વરસાદ વરસ્યો. લોધિકા તાલુકામાં ધોધમાર વરસાદથી ફોફળનદીમાં પાણીની આવક થઈ. જેના કારણે લોધિકાથી કોઠા પીપળીયા અને લોધિકાથી ચાંદલી ગામનો રસ્તો બંધ થયો હતો. લોધિકાના ચીભડા ગામની ભંગડા નદીમાં પણ ઘોડાપુર આવ્યુ.


ઉપલેટા તાલુકાના મોટી પાનેલીમાં પણ ધોધમાર વરસાદ વરસતા ચારેય તરફ જળમગ્ન થયુ. ફુલઝર ડેમમાં નવા નીરની આવક થઈ. તો ઉપરવાસના બુટાવદર, બગધરા, મેથાણ સહિતના ગામોમાં પણ વરસાદ વરસ્યો. પાણીની સતત આવકના કારણે ફુલઝર-1 ડેમમાં જળપસાટી વધી. જેને લઈને નીચાણવાળા ગોલાણીયા, ખંઢેરા, નાગપુર, વાડીસગ ગામને એલર્ટ કરવામાં આવ્યા. તો સાતવડી ગામના કોઝવે પરથી ત્રણ ફુટ પાણી વહ્યુ. જેના કારણે સાતવડીગામ સંપર્ક વિહોણુ થઈ ગયુ.


ધોધમાર વરસાદને કારણે મોતીસર ડેમના બે દરવાજા ખોલવામાં આવ્યા હતા. પાટીયારી, મોટી મેંગણી, નાની મેંગણી સહિતના ગામડાઓમાં પણ છથી સાત ઈંચ જેટલો વરસાદ વરસ્યો. જેના કારણે મોતીસર ડેમના બે દરવાજા ખોલાયા. ધોરાજી તાલુકાના મોટી વાવડી ગામમાં પણ ત્રણ ઈંચથી વધુ વરસાદ વરસતા મોટી વાવડીની ચંદ્રાવતી નદીમાં પુર આવ્યુ. જેના કારણે ગામના અનેક વિસ્તાર પાણી પાણી થયા. આ તરફ ગૌરીદળ, રતનપર, હડાળા, આણંદપર, કોઠારીયા, કોટડા સાંગાણી સહિતના ગામોમાં મૂશળધાર વરસાદ વરસ્યો. ગામની નદીઓમાં નવા નીર આવ્યા.