ભારત અને બાંગ્લાદેશ વચ્ચે કાનપુરના ગ્રીન પાર્ક સ્ટેડિયમ ખાતે બીજી ટેસ્ટ મેચ રમાઇ રહી છે. મેચ દરમિયાન બાંગ્લાદેશના ફેન ટાઇગર રૂબી સાથે સી બાલ્કનીમાં કેટલાક દર્શકોએ મારપીટ કરી હતી. ગંભીર ઈજાઓને કારણે પોલીસ બાંગ્લાદેશી ચાહકને એમ્બ્યુલન્સમાં હોસ્પિટલ લઈ ગઈ હતી. જોકે, પોલીસના જણાવ્યા અનુસાર, બાંગ્લાદેશના પ્રશંસક પર હુમલો થયો નથી પરંતુ ડિહાઇડ્રેશનને કારણે તે બીમાર પડ્યો છે.
નોંધનીય છે કે ચેન્નઈ ટેસ્ટમાં 280 રનની મોટી જીત બાદ ભારતીય ટીમ શુક્રવારે કાનપુરના ગ્રીન પાર્ક સ્ટેડિયમમાં બીજી ટેસ્ટ મેચમાં બાંગ્લાદેશ સામે રમી રહી છે. ભારત ફરી એકવાર બાંગ્લાદેશનો સફાયો કરવા માંગે છે. અત્યાર સુધી બાંગ્લાદેશ ભારતમાં એકપણ ટેસ્ટ મેચ જીતી શક્યું નથી અને ભારતે દરેક શ્રેણી એકતરફી રીતે જીતી છે.
અગાઉ ભારતે 2017માં બાંગ્લાદેશને 1-0થી અને 2019-20માં ટેસ્ટ શ્રેણીમાં 2-0થી હરાવ્યું હતું અને હવે કાનપુરમાં પણ રોહિત શર્માની કેપ્ટનશીપ હેઠળની ભારતીય ટીમ બે ટેસ્ટ મેચની શ્રેણી 2-0થી જીતશે. ચેન્નઈમાં ભારતીય ટીમે જે રીતે વાપસી કરી છે તે ટેસ્ટ ક્રિકેટમાં તેમનું વર્ચસ્વ દર્શાવે છે અને તેમની નજર ઘરઆંગણે સતત 18મી શ્રેણી જીતવા પર છે.
ભારતીય ચાહકો કેપ્ટન રોહિત શર્મા અને સ્ટાર બેટ્સમેન વિરાટ કોહલી પાસેથી મોટી ઇનિંગ્સની અપેક્ષા રાખી રહ્યા છે. પ્રથમ ટેસ્ટ મેચમાં રોહિત અને વિરાટ ફ્લોપ રહ્યા હતા. આ મેચમાં બાંગ્લાદેશના ઝડપી બોલર હસન મહમૂદ અને તસ્કીન અહેમદે બોલરો માટેની અનુકૂળ પીચ પર સારી બોલિંગ કરી હતી. ગ્રીન પાર્કની વિકેટમાંથી સ્પિનરોને મદદ મળી રહી છે. શરૂઆતમાં ઝડપી બોલરોને થોડી મદદ મળે તેવી અપેક્ષા હોવા છતાં મેચ જેમ જેમ આગળ વધશે તેમ તેમ પીચ સ્પિનર્સને મદદ કરશે.
ભારતીય ટીમની પ્લેઈંગ ઈલેવન
યશસ્વી જયસ્વાલ, રોહિત શર્મા (કેપ્ટન), શુભમન ગિલ, વિરાટ કોહલી, ઋષભ પંત (વિકેટકીપર), કેએલ રાહુલ, રવિન્દ્ર જાડેજા, રવિચંદ્રન અશ્વિન, આકાશ દીપ, જસપ્રિત બુમરાહ, મોહમ્મદ સિરાજ