મંગળવારે સેન્ટ્રલ રેલ્વે અને વેસ્ટર્ન રેલ્વેએ રેલ્વે સ્ટેશનો પર ભીડને અટકાવવા પ્લેટફોર્મ ટિકિટની કિંમત 10 રૂપિયાથી વધારીને 50 રૂપિયા કરી દીધી છે. આ મુંબઇ, પુના, ભુસાવલ, નાગપુર અને સોલાપુર વિભાગના તમામ મોટા સ્ટેશનો પર કરવામાં આવ્યું છે.
સેન્ટ્રલ રેલવેના પ્રવક્તાએ જણાવ્યું હતું કે, સ્ટેશનના કદના આધારે કિંમત અલગ-અલગ હશે, પરંતુ મુંબઇના છત્રપતિ શિવાજી મહારાજ ટર્મિનસ (સીએસએમટી) જેવા મોટા સ્ટેશનો પર તે 50 રૂપિયા હશે, એમ સેન્ટ્રલ રેલવેના પ્રવક્તાએ જણાવ્યું હતું.
પશ્ચિમ રેલવે મંડળના જનસંપર્ક અધિકારી પ્રદીપ શર્માએ જણાવ્યું કે, પશ્ચિમ રેલવેના અમદાવાદ મંડળ દ્વારા કોરોના વાયરસના ખતરાને ધ્યાનમાં રાખી મંગળવારથી અમદાવાદ, ગાંધીધામ, પાલનપુર, ભુજ, મહેસાણા, વીરમગામ, મણિનગર, સામખિયાળી, પાટણ, ઊંઝા, સિદ્ધપુર, સાબરમતી સહિત મોટા રેલવે સ્ટેશનો પર ભીડ ઓછી કરવા ટિકિટનો દર 10 રૂપિયાથી વધારીને 50 રૂપિયા કરી દેવામાં આવ્યો છે. આ વધારો અસ્થાયી છે. રેલવે સ્ટેશનો પર લોકો કારણ વગર ભેગા ન થાય તે માટે આ પગલું લેવામાં આવ્યું છે.
કોરોનાના ડરથી રેલવે મેનેજમેન્ટે તમામ ડિવિઝનમાં કોચને અંદરથી પૂરી રીતે સ્વચ્છ કરવાનો આદેશ આપ્યો છે. રેલવેએ તમામ કોચને લાઇઝોલ જેવા કીટનાશકોથી ચોખ્ખા કરવા જણાવ્યું છે. આ ઉપરાંત ઈએમયુ અને ડેમો કોચમાં જંતુનાશક દવાનો છંટકાવ કરવાનો નિર્દેશ પણ આપ્યો છે. ટ્રેનના તમામ કોચમાં પૂરતી માત્રામાં લિક્વિડ સોપનો સ્ટોક રાખવા પણ જણાવ્યું છે.