Covid guidelines for International Arrivals: ચીન-જાપાન સહિત વિશ્વના ઘણા દેશોમાં કોરોના વાયરસે હાહાકાર મચાવ્યો છે. કોરોનાના ખતરાને જોતા ભારત સરકારે આ દેશોમાં પ્રવાસ કરતા લોકો માટે કોવિડની સુધારેલી ગાઈડલાઈન બહાર પાડી છે. હવે ચીન, સિંગાપોર, હોંગકોંગ, કોરિયા, થાઈલેન્ડ અને જાપાન જેવા 6 દેશોમાંથી આવતા લોકો માટે RT-PCR નેગેટિવ ટેસ્ટ રિપોર્ટ ફરજિયાત કરવામાં આવ્યો છે. કોવિડની સુધારેલી માર્ગદર્શિકામાં અન્ય ઘણી બાબતોનો પણ ઉલ્લેખ કરવામાં આવ્યો છે.


ભારતીય નાગરિક ઉડ્ડયન મંત્રાલય દ્વારા કહેવામાં આવ્યું છે કે નવા વર્ષની શરૂઆતથી એટલે કે 1 જાન્યુઆરી, 2023થી ચીન, સિંગાપોરથી તમામ આંતરરાષ્ટ્રીય ફ્લાઈટ્સમાં આવનારા મુસાફરો માટે RT-PCR નેગેટિવ ટેસ્ટ રિપોર્ટ જરૂરી રહેશે. હોંગકોંગ, રિપબ્લિક ઓફ કોરિયા, થાઈલેન્ડ અને જાપાનની મુસાફરી કરીને આવતા મુસાફરો માટે  RT-PCR નેગેટિવ ટેસ્ટ રિપોર્ટ ફરજિયાત રહેશે, જે તેમણે એરપોર્ટ છોડતા પહેલા બતાવવાનું રહેશે.


મંત્રાલયે જણાવ્યું હતું કે એરલાઇન્સને તેમની ચેક-ઇન કાર્યકારી ક્ષમતામાં કેટલાક ફેરફારો કરવા અને ચીન સહિત છ દેશોમાં મુસાફરી કરનારા મુસાફરોને જ બોર્ડિંગ પાસ આપવાનો નિર્દેશ આપવામાં આવ્યો છે જેમણે એર સુવિધા પોર્ટલ દ્વારા નોંધણી કરાવી છે. 


મુસાફરોએ સેલ્ફ ડિક્લિયરેશન ફોર્મ બતાવવું પડશે 


મંત્રાલયના નિવેદનમાં કહેવામાં આવ્યું છે કે, "ચીન, સિંગાપોર, હોંગકોંગ, રિપબ્લિક ઓફ કોરિયા, થાઇલેન્ડ અને જાપાનથી તમામ આંતરરાષ્ટ્રીય ફ્લાઇટ્સ પર મુસાફરી કરતા મુસાફરો માટે એર સુવિધા પોર્ટલ સેલ્ફ ડિક્લિયરેશન ફોર્મ  જોડવામાં આવ્યું છે.  જેમાં વિદેશથી ભારત આવતા આ મુસાફરો માટે RT-PCR નેગેટિવ ટેસ્ટ રિપોર્ટ તેમજ સેલ્ફ ડિક્લિયરેશન ફોર્મ  અપલોડ કરવાની મંજૂરી આપવાની જોગવાઈ ઉમેરવામાં આવી છે.


તમામ મુસાફરોનો RT-PCR ટેસ્ટ રિપોર્ટ પણ જરૂરી છે


કોવિડની સુધારેલી માર્ગદર્શિકા અનુસાર, લોકોએ તેમની હવાઈ મુસાફરી શરૂ કરતા 72 કલાક પહેલા RT-PCR ટેસ્ટ કરાવવો જરૂરી છે. બીજી ખાસ વાત એ છે કે તમામ ઈન્ટરનેશનલ ફ્લાઈટ્સમાં આવતા 2% મુસાફરોના રેન્ડમ ટેસ્ટિંગની હાલની સિસ્ટમ પણ ચાલુ રહેશે.


SARS-CoV-2 વેરિએન્ટ 6 દેશોમાં જોવા મળ્યો


અધિકારીઓએ જણાવ્યું હતું કે વિશ્વના વિવિધ ભાગોમાં કોરોના વાયરસના ચેપના વધતા જતા કેસ અને 6 દેશોમાં SARS-CoV-2 વેરિઅન્ટના અહેવાલો વચ્ચે આ નિર્ણય લેવામાં આવ્યો છે. આજે, ભારતના નાગરિક ઉડ્ડયન મંત્રાલયે તમામ વાણિજ્યિક એરલાઇન્સ, એરપોર્ટ ઓપરેટરો અને રાજ્યો/કેન્દ્રશાસિત પ્રદેશોના મુખ્ય સચિવો/પ્રશાસકોને સુધારેલી કોવિડ માર્ગદર્શિકા વિશે માહિતી મોકલી. સત્તાવાર માહિતી અનુસાર, 29 ડિસેમ્બરના રોજ કુલ 83,003 વિદેશી પ્રવાસીઓ દેશમાં આવ્યા હતા.