Ratan Tata Death: ભારતના પ્રખ્યાત ઉદ્યોગપતિ રતન ટાટાના નિધનથી દરેકની આંખો ભીની છે. તેમણે બુધવારે મુંબઈની કેન્ડી હોસ્પિટલમાં 86 વર્ષની વયે અંતિમ શ્વાસ લીધા હતા. ગુરુવારે, તેમના નશ્વર અવશેષોને મુંબઈના NCPA ગ્રાઉન્ડમાં અંતિમ દર્શન માટે રાખવામાં આવ્યા હતા, જ્યાં તેમના અંતિમ દર્શન માટે એક સ્ટ્રીટ ડોગ પણ આવ્યો હતો. જે બાદ શોકનું વાતાવરણ વધુ ગમગીન થઈ ગયું.
'ગોવા' એ રતન ટાટાના પાર્થિવ શરીર પાસે પહોંચ્યા પછી તે શબપેટીની પાસેની ખાલી જગ્યાને વળગીને બેસી ગયો અને જ્યારે તેઓએ કૂતરાને ત્યાંથી હટાવવાનો પ્રયાસ કર્યો, ત્યારે તે જમીન પર સૂઈ ગયો.
એક કેરટેકરે કહ્યું કે ગોવા રતન ટાટાની "ખૂબ નજીક" હતો. જ્યારે ફોટોગ્રાફરો 'ગોવા'ની તસવીરો લેવા માટે ધક્કામુક્કી કરવા લાગ્યા, ત્યારે કેરટેકરે તેમને પાલતુ પ્રાણીને જવા દેવાની વિનંતી કરી અને કહ્યું કે તેણે સવારથી કંઈ ખાધું નથી. રતન ટાટાનો કૂતરા પ્રત્યેનો પ્રેમ જાણીતો છે. વર્ષ 2020 માં, તેણે બોમ્બે હાઉસના કૂતરાઓ સાથે તહેવારની ઉજવણી કરતી એક તસવીર ઇન્સ્ટાગ્રામ પર પોસ્ટ કરી હતી, જેમાં તેની સાથે ગોવા પણ જોવા મળ્યો હતો.
આ અગાઉના દિવસે, MNS પ્રમુખ રાજ ઠાકરેએ રતન ટાટાને યાદ કરતાં કહ્યું હતું કે ટાટા કૂતરા પ્રત્યેના તેમના અપાર પ્રેમ માટે જાણીતા હતા. ટાટાના તમામ પરિસરમાં સ્ટ્રીટ ડોગ્સને મંજૂરી આપવામાં આવી હતી, પછી તે હોટેલ તાજ હોય કે,ટાટા જૂથનું મુખ્ય મથક બોમ્બે હાઉસ.
સ્ટ્રીટ ડોગને ટેક્સીમાં લાવવામાં આવ્યો
સ્ટ્રીટ ડોગને અંતિમ શ્રદ્ધાંજલિ માટે ટેક્સીમાં NCPA ગ્રાઉન્ડ પર લઈ જવામાં આવી રહ્યો હતો. જો કે, મેદાનની બહાર હાજર સુરક્ષાકર્મીઓએ ટેક્સીને રોકી અને પૂછપરછ બાદ તેમને અંદર જવા દીધા. જણાવવામાં આવી રહ્યું છે કે સ્ટ્રીટ ડોગનું નામ ખુદ રતન ટાટાએ ગોવા રાખ્યું હતું. આ સ્ટ્રીટ ડોગ બોમ્બે હાઉસમાં રહે છે.
રતન ટાટાએ આપ્યું હતું નામ
રતન ટાટાએ આ નામ લગભગ 11 વર્ષ પહેલા આપ્યું હતું જ્યારે ટાટાનો એક કર્મચારી ગોવા કામ માટે ગયો હતો અને રસ્તામાં તેને એક કૂતરો મળ્યો હતો, જેને તે પોતાની સાથે મુંબઈ લઈ આવ્યો હતો. તેમણે કૂતરાનું નામ 'ગોવા' એટલા માટે રાખ્યું, કારણ કે તેને તે ગોવામાં મળી આવ્યો હતો. આ સ્ટ્રીટ ડોગ ગોવા છેલ્લા 11 વર્ષથી રતન ટાટાના ઘરે રહે છે, જે તેનો (રતન ટાટાનો) શ્વાન પ્રત્યેનો ઊંડો પ્રેમ દર્શાવે છે.
વરલીમાં થયા અંતિમ સંસ્કાર
રતન ટાટાના પાર્થિવ દેહને બપોરે 3.30 વાગ્યા સુધી અંતિમ દર્શન માટે રાખવામાં આવ્યો હતો, જ્યાં મોટી સંખ્યામાં લોકો તેમને શ્રદ્ધાંજલિ આપવા આવ્યા હતા. આ પછી, મોડી સાંજે મુંબઈના વરલી સ્થિત સ્મશાન ગૃહમાં તેમના અંતિમ સંસ્કાર સંપૂર્ણ રાજકીય સન્માન સાથે કરવામાં આવ્યા હતા.
આ પણ વાંચો...