Delhi Weather Update: દિલ્હીમાં પ્રદૂષણ ખતરનાક સ્તરે છે. આ સ્થિતિમાં પાટનગરના મોટાભાગના વિસ્તારો સવારથી સાંજ સુધી ધુમ્મસની લપેટમાં રહે છે. આ દરમિયાન હવામાન વિભાગે રાજધાની દિલ્હીમાં વરસાદની સંભાવના વ્યક્ત કરી છે. IMD અનુસાર, શુક્રવારે (10 નવેમ્બર) દિલ્હીમાં વાદળછાયું વાતાવરણ રહેશે. આ સમયગાળા દરમિયાન હળવા વરસાદની સંભાવના છે. આવી સ્થિતિમાં વરસાદ બાદ દિલ્હીના લોકોને પ્રદૂષણથી રાહત મળી શકે છે. ખરેખર, વરસાદને કારણે પ્રદૂષણ ઓછું થાય છે. ગુરુવારે (9 નવેમ્બર) દિલ્હીનો AQI 431 નોંધાયો હતો, જે ગંભીર શ્રેણીમાં આવે છે.
દેશના આ રાજ્યોમાં વરસાદની શક્યતા
હવામાન વિભાગના જણાવ્યા અનુસાર કેરળ અને તમિલનાડુમાં 9 અને 10 નવેમ્બરે ભારે વરસાદની સંભાવના છે. વેસ્ટર્ન ડિસ્ટર્બન્સના કારણે 9 અને 10 નવેમ્બરે મેદાની વિસ્તારોમાં વરસાદની સંભાવના છે. આ સિવાય પહાડી વિસ્તારોમાં (હિમાચલ પ્રદેશ અને ઉત્તરાખંડ)માં પણ હિમવર્ષા થઈ શકે છે. હવામાન વિભાગે દેશમાં વિવિધ સ્થળોએ વરસાદને લઈને ચેતવણી પણ જારી કરી છે.
આ સ્થળોએ એલર્ટ જારી કરવામાં આવ્યું છે
IMD એ તમિલનાડુમાં ભારે વરસાદની આગાહી કરી છે અને આગામી બે દિવસ સુધી કેરળની સાથે તમિલનાડુના કેટલાક સ્થળોએ ભારે વરસાદની ચેતવણી જારી કરી છે. એટલું જ નહીં, IMD એ બંને રાજ્યો માટે યલો એલર્ટ પણ જાહેર કર્યું છે.
2 દિવસ પછી તાપમાનમાં ઘટાડો શરૂ થશે
હવામાન વિભાગના જણાવ્યા અનુસાર 10 નવેમ્બર બાદ આગામી પાંચ દિવસ સુધી ક્યાંય પણ ભારે વરસાદની શક્યતા નથી. 48 કલાક પછી ઉત્તર-પશ્ચિમ ભારતના ઘણા ભાગોમાં લઘુત્તમ તાપમાનમાં ધીમે ધીમે 2 થી 4 ડિગ્રી સેલ્સિયસનો ઘટાડો થશે.
દરમિયાન, ગુરુવારે (9 નવેમ્બર) તમિલનાડુ અને પુડુચેરીમાં અલગ-અલગ સ્થળોએ ભારે વરસાદ થયો હતો. રાયલસીમા અને આંતરિક કર્ણાટકમાં અલગ-અલગ સ્થળોએ ભારે વરસાદ જોવા મળ્યો છે. ઉત્તરાખંડમાં 9 અને 10 નવેમ્બરે હળવાથી મધ્યમ વરસાદ અને હિમવર્ષાની સંભાવના છે.
પ્રાથમિક શાળાઓ પણ 10મી નવેમ્બર સુધી બંધ
ખરાબ હવાના કારણે 5 ધોરણ સુધીની તમામ શાળાઓ 10 નવેમ્બર સુધી બંધ રહેશે. આ સાથે ધોરણ 6 થી ધોરણ 9 અને ધોરણ 11 ના બાળકો માટેની શાળાઓ પણ 10 નવેમ્બર સુધી બંધ કરી દેવામાં આવી છે.. શાળાઓ માત્ર ધોરણ 10 અને 12ના બાળકો માટે જ ખુલ્લી રહેશે કારણ કે તેમની બોર્ડની પરીક્ષાઓ આવવાની છે.