Dharmendra Pradhan resignation update: NEET પેપર લીક મામલે દેશભરમાં ચાલી રહેલા ઉગ્ર આંદોલનો અને વિરોધ પ્રદર્શનો વચ્ચે બુધવારે (22 જુલાઈ) કેન્દ્રીય મંત્રી જેપી નડ્ડાએ એક મહત્વની પ્રેસ કોન્ફરન્સ યોજી હતી. આ દરમિયાન તેમણે શિક્ષણ મંત્રી ધર્મેન્દ્ર પ્રધાનના રાજીનામાની માંગ અંગે સ્પષ્ટતા કરી હતી અને રાહુલ ગાંધી પર આકરા પ્રહાર કર્યા હતા. નડ્ડાએ સ્પષ્ટ કહ્યું કે વિદ્યાર્થીઓના મુદ્દા પર કોઈ જ પ્રકારનું રાજકારણ ન થવું જોઈએ અને સરકાર આ મામલે સંસદમાં ગમે તેટલો સમય ચર્ચા કરવા માટે સંપૂર્ણપણે તૈયાર છે. આ ઉપરાંત તેમણે સામાજિક કાર્યકર સોનમ વાંગચુક અને CJP નેતાઓ સાથે થયેલી મુલાકાત વિશે પણ મહત્વની વિગતો મીડિયા સમક્ષ શેર કરી હતી.
શું ધર્મેન્દ્ર પ્રધાન આપશે રાજીનામું?
વિપક્ષ દ્વારા સતત કરવામાં આવી રહેલી શિક્ષણ મંત્રી ધર્મેન્દ્ર પ્રધાનના રાજીનામાની માંગ પર બોલતા નડ્ડાએ કહ્યું કે, આ મુદ્દે સંસદમાં જ વિગતવાર ચર્ચા થવી જોઈએ. સરકાર NEET પેપર લીક મામલે અત્યંત ગંભીર છે. વિપક્ષ જ્યારે પણ ઈચ્છે ત્યારે ચર્ચા માટે પોતાનો સમય નક્કી કરી શકે છે.
રાહુલ ગાંધી અને વિપક્ષ પર સાધ્યું સીધું નિશાન
જેપી નડ્ડાએ વિપક્ષી નેતા રાહુલ ગાંધી પર સીધો પ્રહાર કરતા સવાલ કર્યો કે, "રાહુલ ગાંધી આટલા સિલેક્ટિવ કેમ છે? તમે UPA અને INDI ગઠબંધનની સરકારોના સમયમાં થયેલા પેપર લીક પર ક્યારેય ચર્ચા કેમ નથી કરતા?"
તેમણે આરોપ લગાવ્યો કે વિપક્ષનો મુખ્ય ઉદ્દેશ્ય વિદ્યાર્થીઓનું કલ્યાણ કરવાનો કે શિક્ષણની ગુણવત્તા સુધારવાનો નથી, પરંતુ આ સંવેદનશીલ મુદ્દાનો માત્ર રાજકીય લાભ ઉઠાવવાનો છે. નડ્ડાએ વધુમાં ઉમેર્યું કે, "કોંગ્રેસના શાસનમાં જ સૌથી વધુ પેપર લીકની ઘટનાઓ બની હતી. તાજેતરમાં ઝારખંડ અને તેલંગાણામાં પણ પેપર લીક થયા, જ્યાં ભાજપ સત્તામાં નથી. મારી અપીલ છે કે આ મુદ્દાનું રાજકારણ ન થવું જોઈએ." આજે સાંજે 4 વાગ્યે રાહુલ ગાંધી દ્વારા 150 પેપર લીકના દાવા અંગેના પ્રેઝન્ટેશન પર નડ્ડાએ ખાતરી આપી હતી કે સરકાર તેમના તમામ આરોપોની ઝીણવટભરી તપાસ કરશે.
આ પણ વાંચોઃ વિદ્યાર્થીઓ પર લાઠીચાર્જથી અન્ના હજારે દુઃખી: PM મોદીને પત્ર લખીને આંદોલનની કરી જાહેરાત
"સંસદમાં ચર્ચા માટે અમે ગમે તેટલો સમય આપવા તૈયાર છીએ"
ચર્ચાની તૈયારી દર્શાવતા કેન્દ્રીય મંત્રીએ કહ્યું કે, "અમે ઈચ્છીએ છીએ કે સંસદમાં આ મુદ્દે ઊંડાણપૂર્વક ચર્ચા થાય. વિપક્ષ જેટલો પણ સમય માંગશે, અમે ફાળવવા તૈયાર છીએ. હું અત્યારે કોઈને દોષી નથી ઠેરવી રહ્યો. આપણે સૌએ મળીને આ સમસ્યાનો ઉકેલ કેવી રીતે લાવવો તેની ચર્ચા કરવી જોઈએ."
તેમણે ભારપૂર્વક કહ્યું કે વડાપ્રધાન મોદીના નેતૃત્વમાં ભાજપ અને NDA સરકાર વિદ્યાર્થીઓના હિત માટે અત્યંત ગંભીર છે. બાળકો દેશનું ભવિષ્ય છે, એટલે તેમની સંભાળ લેવાની જવાબદારી સરકારની છે, પરંતુ વિપક્ષે પણ સરકાર સાથે મળીને પોતાની જવાબદારી નિભાવી એક કાયમી ઉકેલ શોધવો જોઈએ.
આ પણ વાંચોઃ સોનમ વાંગચુક અનશન તોડશે? જેપી નડ્ડા સાથેની મુલાકાત બાદ સરકાર સામે મૂકી આ મોટી શરતો
સોનમ વાંગચુકની મુલાકાત વિશે શું કહ્યું?
ગુરુગ્રામની મેદાંતા હોસ્પિટલમાં દાખલ સોનમ વાંગચુકની મુલાકાત વિશે પૂછવામાં આવતા નડ્ડાએ જણાવ્યું કે, "અમે તેમના ખબરઅંતર પૂછવા ગયા હતા. તેઓ ICU માં હોવાથી સ્વાભાવિક રીતે જ તેમને મળવું થોડું મુશ્કેલ હતું, છતાં અમે તેમના સ્વાસ્થ્યની જાણકારી મેળવી ઝડપી સ્વસ્થ થવાની કામના કરી છે. અમે તેમને અપીલ કરી છે કે તેઓ પોતાની ભૂખ હડતાળ સમેટી લે અને મુખ્ય પ્રવાહમાં જોડાઈને વિદ્યાર્થીઓને સાચી દિશામાં માર્ગદર્શન આપે."
CJP નેતાઓ સાથેની બેઠક રહી સકારાત્મક
CJP ના પ્રતિનિધિઓ સાથેની બેઠક અંગે તેમણે કહ્યું કે, "અમારી વચ્ચે ખૂબ જ સૌહાર્દપૂર્ણ વાતાવરણમાં ચર્ચા થઈ હતી. અમે તેમના મંતવ્યો અત્યંત ધીરજપૂર્વક સાંભળ્યા છે. મેં તેમને સૂચન કર્યું હતું કે તેઓ પોતાના મંતવ્યો લેખિતમાં રજૂ કરે. તેમણે તેમ કર્યું છે, અને મેં તેમને ખાતરી મુજબ લેખિતમાં જવાબ પણ આપ્યો છે. મેં તેમને સ્પષ્ટ કહી દીધું છે કે જ્યારે પણ તેઓ આ મુદ્દે ચર્ચા કરવા ઈચ્છશે, અમે તેના માટે હંમેશા તૈયાર છીએ."