Gujarat Election 2022: ગુજરાત વિધાનસભા ચૂંટણી 2022માં ભારતીય ક્રિકેટર રવિન્દ્ર જાડેજાની પત્નીને ભાજપે ઉમેદવાર બનાવ્યા છે. જાડેજાના પત્ની રિવાબા જામનગર ઉત્તર વિધાનસભા બેઠક પરથી ટિકિટ ચૂંટણી લડી રહ્યા છે. રિવાબાએ 14 નવેમ્બરે પોતાનું ઉમેદવારી પત્ર ભર્યું હતું, જે દરમિયાન તેમણે એફિડેવિટ પણ ફાઈલ કરી હતી. એફિડેવિટમાં રિવાબા જાડેજાએ પોતાની મિલકતોની જાણકારી આપી છે.
દાખલ કરાયેલી એફિડેવિટ મુજબ રિવાબા જાડેજા કરોડો રૂપિયાની સંપત્તિની માલિક છે. જાડેજા દંપતી પાસે 97 કરોડ રૂપિયાની સંપત્તિ છે જેમાં કરોડો રૂપિયાની જમીન સાથેનું આલિશાન ઘર પણ સામેલ છે. રિવાબાએ જણાવ્યું હતું કે તેની અને તેના પતિ પાસે એક કરોડ રૂપિયાના દાગીના છે. રવિન્દ્ર જાડેજા ભારતનો એક મોટો ક્રિકેટર છે. ક્રિકેટ સિવાય તે ઘણી બ્રાન્ડ્સને પણ એન્ડોર્સ કરે છે જેમાંથી તે કમાણી કરે છે. રવિન્દ્ર જાડેજાએ વર્ષ 2021-22માં 18.56 કરોડ રૂપિયાની કમાણી દર્શાવી હતી.
એફિડેવિટમાં રીવાબાએ જણાવ્યું હતું કે તેમની અને તેમના પતિ રવિન્દ્ર જાડેજાની કુલ 97 કરોડની સંપત્તિ છે. રિવાબા પાસે 62.35 લાખ રૂપિયાની જંગમ સંપત્તિ છે જ્યારે રવિન્દ્ર જાડેજા પાસે 37.43 કરોડ રૂપિયાની જંગમ સંપત્તિ છે. આ સિવાય જો તેમના પરિવારની જંગમ સંપત્તિની વાત કરીએ તો તે 26.25 કરોડ રૂપિયા છે. રવિન્દ્ર જાડેજા પાસે 33 કરોડ 5 લાખ રૂપિયાથી વધુની સ્થાવર સંપત્તિ છે. જેમાં ખેતીની જમીન, કોમર્શિયલ પ્લોટ, રહેણાંક પ્લોટ અને તેમના આલીશાન મકાનનો સમાવેશ થાય છે.
રિવાબા પાસે 34.80 લાખની કિંમતનું સોનું
ક્રિકેટર રવિન્દ્ર જાડેજા પાસે પણ સોના, ચાંદી અને હીરાનો ખજાનો છે. એફિડેવિટમાં કહેવામાં આવ્યું છે કે રિવાબા પાસે 34.80 લાખ રૂપિયાના સોનાના ઘરેણા, 14.80 લાખ રૂપિયાના હીરા અને 8 લાખ રૂપિયાના ચાંદીના ઘરેણા છે. જ્યારે રવિન્દ્ર જાડેજા પાસે 23.43 લાખની કિંમતના સોનાના દાગીના છે. આ સિવાય તેમની પાસે દોઢ કરોડ રૂપિયાની કિંમતના મોંઘા વાહનો છે. નોંધનીય છે કે 182 સભ્યોની ગુજરાત વિધાનસભા માટે બે તબક્કામાં 1 અને 5 ડિસેમ્બરે ચૂંટણી યોજાશે, જ્યારે મતગણતરી 8 ડિસેમ્બરે થશે.