પોલીસ પાસેથી મળી રહેલી માહિતી પ્રમાણે, બાયો સાયન્સ વિભાગમાં અભ્યાસ કરતી એક વિદ્યાર્થિની સોમવારે બપોરના સમયે વોશરૂમમાં ગઈ હતી. તે દરમિયાન તેણે જોયું કે, વોશરૂમની દિવાસ પાસે કોઈ વિદ્યાર્થીનો હાથ જોયો હતો અને તેના હાથમાં લાલ કલરનો એક મોબાઈલ ફોન હતો. વિદ્યાર્થિનીને શંકા જતાં તે તુરંત બહાર દોડી તો એક વિદ્યાર્થી ફટાફટ દોડીને ત્યાંથી જઈ રહ્યો હતો. કોલેજમાં બોય્ઝ અને લેડીઝ ટોઈલેટની કોમન દિવાલ જ છે. બોય્ઝ ટોઈલેટની દિવાલ પરથી વિદ્યાર્થી મોબાઈલમાં વીડિયો બનાવતો હતો તેવું જાણવા મળ્યું હતું.
વિદ્યાર્થિનીએ આ સમગ્ર ઘટના અંગે પ્રિન્સિપાલને જાણ કરી હતી. પ્રિન્સિપાલે તે વિદ્યાર્થીને અટકાવ્યો હતો અને તેના મોબાઈલની તપાસ કરી હતી. કોલેજથી ઘરે ગયા બાદ વિદ્યાર્થિનીએ તેના પરિવારજનોને આ અંગે જાણ કરી હતી. આ ગંભીર ઘટનામાં વિદ્યાર્થિનીએ તે યુવક સામે ઉમરા પોલીસ સ્ટેશનમાં ફરિયાદ નોંધાવી હતી. આ અંગે હવે પોલીસ દ્વારા વધુ તપાસ કરવામાં આવી રહી છે.