'અપને શહર મેં કુછ ભી ઈલ્લીગલ દિખે તો......', ગુજરાતમાં ક્યા શહેરની પોલીસે 'પુષ્પા'નું પોસ્ટર મૂકીને કરી અપીલ ?

હાલમાં સમગ્ર ગુજરાત સહિત આખા દેશમાં સાઉથ સુપરસ્ટાર અલ્લુ અર્જુનની ફિલ્મ “પુષ્પા”નો ક્રેઝ ચાલી રહ્યો છે. ‘પુષ્પા’ ફિલ્મના વિવિધ ડાયલોગ અને ગીત પર સોશિયલ મીડિયામાં રીલ બનાવી રહ્યાં છે.

સુરતઃ હાલમાં સમગ્ર ગુજરાત સહિત આખા દેશમાં સાઉથ સુપરસ્ટાર અલ્લુ અર્જુનની ફિલ્મ “પુષ્પા”નો ક્રેઝ ચાલી રહ્યો છે. ‘પુષ્પા’ ફિલ્મના વિવિધ ડાયલોગ અને ગીત પર સોશિયલ મીડિયામાં રીલ બનાવી રહ્યાં છે. પુષ્પા ફિલ્મના રંગે સુરત પોલીસ પણ રંગાઇ હતી.

સુરત પોલીસ દ્ધારા ટ્વિટર પર પુષ્પા ફિલ્મનો ડાયલોગ લખીને લોકોને સલાહ આપી છે. સુરતીઓની સમસ્યાના નિવારણ તેમજ ગુનાખોરીને ડામવા માટે સુરત શહેર પોલીસ દ્વારા એક સ્પેશિયલ ટીમ બનાવવામાં આવી છે. આ ટીમ ફેસબુક અને ટ્વીટરના માધ્યમ થકી સતત લોકોના પ્રશ્નોનો ઉકેલ લાવવાનો પ્રયત્ન કરે છે.

સુરત પોલીસે પોતાના સત્તાવાર સોશિયલ મીડિયા પર એક અનોખી પોસ્ટ કરી છે. તેમણે પુષ્પરાજના અંદાજમાં લખ્યું હતું કે ‘અપને શહર મે કુછ ભી ઇલ્લીગલ દિખે તો.. ઝુકને કા નઇ...100 ડાયલ કરને કા ’ સુરત પોલીસે ગુનાખોરીને ડામવા માટે શહેરીજનોને સહકાર આપવા સંદેશો આપી રહી છે.

નોંધનીય છે કે ક્રિકેટરો, એક્ટર્સ, સામાન્ય લોકોથી માંડી તમામ લોકો પુષ્પા ફિલ્મના દિવાના થયા છે. ઓસ્ટ્રેલિયન ક્રિકેટર ડેવિડ વોર્નર પર અભિનેતા અલ્લુ અર્જૂન (Actor Allu Arjun)ની ફિલ્મ પુષ્પા (Pushpa)ની દિવાનગી ચઢી ગઇ છે. 

ડેવિડ વોર્નર (David Warner)એ તાજેતરમાં જ ફિલ્મ પુષ્પાના ગીત શ્રીવલ્લી (Srivalli)ના હૂક સ્પેટને કૉપી કર્યા છે. અભિનેતા અલ્લુ અર્જૂન (Allu Arjun)ની પણ કૉમેન્ટ કરવા પોતાને નથી રોકી શક્યા. ડેવિડ વોર્નરે (David Warner) સોશ્યલ મીડિયા પર ડાન્સની એક ક્લિપ શેર કરી છે.