સુરત: સુરત મહાનગરપાલિકાના અધિકારીઓ સામે આકરણી કૌભાંડના આરોપ લાગ્યા છે. ખુદ ભાજપના જ કોર્પોરેટરે ફરિયાદ કરતા મ્યુનિસિપલ કમિશનરે તપાસના આદેશ આપ્યા છે. ભાજપ કોર્પોરેટર નરેન્દ્ર પાંડવના મતે કતારગામ ઝોનમાં અનેક મોટા માથાઓના ફાર્મ હાઉસ આવેલા છે. જેમાંના ઘણા ફાર્મ હાઉસ એવા છે જેની ક્ષેત્રફળ કરતા ઓછી આકરણી કરવામાં આવી છે. આમ કરીને મહાનગરપાલિકાને લાખો રૂપિયાનો ચૂનો ચોપડવામાં આવ્યો છે.
કૌભાંડમાં મનપાના અધિકારીઓ અને કર્મચારીઓ પણ સામેલ છે. ભાજપ કોર્પોરેટરે 10થી વધુ ફાર્મ હાઉસની યાદી મનપા કમિશનરને સોંપી છે અને દાવો કર્યો કે, કેટલાક ફાર્મ હાઉસમાં કાર્યક્રમો યોજાય છે તો કેટલાક ફાર્મ હાઉસ ભાડે આપી કમાણી કરવામાં આવે છે. આટ આટલુ થતું હોવા છતાં આવા ફાર્મ હાઉસના માલિકો પાસેથી ઓછો વેરો વસૂલાય છે જે અયોગ્ય છે.
અમદાવાદના કાલુપુરમાં ભર બપોરે યુવકને છરીના ઘા ઝિંકી પતાવી દીધો
રિક્ષામાં ત્રણ શખ્સ જતા હતા ત્યારે પાછળ રિક્ષામાં આવેલા શખ્સોએ પહેલા રિક્ષા પર તીક્ષ્ણ હથિયારો વડે હુમલો કર્યો હતો. જેથી રિક્ષામાં બેઠેલા ત્રણેય શખ્સ ભાગ્યા હતા. તેનો પીછો કરીને આરોપી સાદિક હુસેન અને લીયાકત હુસેને ભેગા મળીને તીક્ષ્ણ હથિયારો વડે પાંચકુવા પાસે જાહેરમાં સબાન અલી મોમીનને ઘા માર્યા હતા. સબાનઅલીને VS હોસ્પિટલ લઈ જવાતા ફરજ પરના ડોક્ટરે મૃત જાહેર કર્યો હતો. ફરિયાદી મોહમ્મદ ફૈઝાન અતરવાલા, મૃતકનો માસિયાઈ ભાઈ છે. ફરિયાદીના ભાઈ કાસીમહુસેનને પણ તલવારના ઘા મરાયા હતા. પ્રાથમિક માહિતી પ્રમાણે લગ્ન પ્રસંગમાં જમવાની બાબતમાં ટોકવા જેવી બાબતમાં મનદુઃખ રાખીને આરોપીઓએ હુમલો કર્યો હતો.
સીટીએમમાં ડબલ ડેકર બ્રિજ પરથી યુવતીએ લગાવી છલાંગ
સીટીએમ પાસેના ડબલ ડેકર ઓવરબ્રિજ ઉપરથી ગઈકાલે બપોરે અજાણી યુવતીએ છલાંગ મારીને આપઘાતનો પ્રયાસ કર્યો હતો. જો કે લોકો બચાવવા જાય તે પહેલા યુવતીએ કૂદકો માર્યો હતો.ગંભીર હાલતમાં યુવતીને સારવાર માટે હોસ્પિટલમાં દાખલ કરવામાં આવી છે. આ બનાવનો વિડિયો સોશિયલ મીડિયામાં વાયરલ થયો હતો. આ કેસની વિગત એવી છે કે પૂર્વ વિસ્તારમાં ખોખરાથી સીટીએમ તરફ જતા ઓવરબ્રિજ ઉપર ગઈકાલે બપોરે એક યુવતીએ અગમ્ય કારણોસર ડબલ ડેકર ઓવર બ્રિજ ઉપરથી કૂદકો મારતી હોવાની જાણ થતાં લોકોનું ટોળું એકઠું થયું હતું. લોકો બચાવવા જાય તે પહેલા યુવતીએ બ્રિજ ઉપરથી છલાંગ મારી હતી જેથી શરીરે ગંભીર ઇજાઓ થઇ હતી. આ બનાવની જાણ થતાં એમ્બ્યુલન્સ આવી પહોચી હતી અને સ્થળ પર સારવાર કરીને વધુ સારવાર માટે હોસ્પિટલમાં ખસેડવામાં આવી હતી. પૂર્વ વિસ્તારમાં છેલ્લા કેટલાક સમયથી ગૃહ કલેશના કારણે મહિલાના આપઘાતના બનાવો વધી રહ્યા છે.