Alcohol Party: સુરત સહિત સમગ્ર ગુજરાતમાં હાલ લઠ્ઠાકાંડ હોટ ટોપીક છે. ગુજરાતમાં દારુબંધી મુદ્દે વિરોધપક્ષો પણ સરકારને ઘેરી રહ્યા છે. દારુના મુદ્દે બુધવારે સુરત મહાનગરપાલિકાની સામાન્ય સભા બાદ આપ-ભાજપના કોર્પોરેટરો વચ્ચે મારમારી પણ થઇ ચુકી છે. ત્યારે ગઈ રાતે ભાજપ નેતાઓની દારુની મહેફિલનો વિડીયો એકાએક વાયરલ થતા રાજકારણમાં વધુ ગરમાવો આવી ગયો છે.
વિડીયોમાં એક રૂમમાં દારુની મહેફિલમાં ભાજપના વોર્ડ નંબર-૧૬ના પ્રમુખ જયસુખ ઠુમ્મર અને વોર્ડ નંબર- ૧૬ના બક્ષીપંચ મોરચાના મહામંત્રી શાંતિલાલ સુતરીયાના હાથમાં દારુનો ગ્લાસ છે. અને વિડીયો તેમની સામે બેઠેલી કોઇ અંગત વ્યક્તિએ ઉતાર્યો હોવાનું જણાય છે. જોકે, વિડીયો ક્યારે ઉતારાયો ? અને કયા સ્થળે ઉતારાયો છે તેની સ્પષ્ટતા નથી. પણ લઠ્ઠાકાંડ વચ્ચે ભાજપ નેતાઓની દારુની મહેફિલના વિડીયોએ સ્થાનિક રાજકારણમા ખળભળાટ મચાવ્યો છે.
બોટાદ લઠ્ઠાકાંડમાં મોટી કાર્યવાહી
બોટાદના બરવાળાના કેમિકલ લઠ્ઠાકાંડમાં ફરી એકવાર કાર્યવાહી કરવામાં આવી છે. મળતી જાણકારી અનુસાર અમદાવાદ ગ્રામ્ય અને બોટાદ જિલ્લા પોલીસવડાની બદલી તથા 6 અધિકારીઓને સસ્પેન્ડ કર્યા બાદ હવે 12 પોલીસ કર્મચારીઓની અલગ અલગ જિલ્લાઓમાં બદલી કરવામાં આવી છે.
મળતી જાણકારી અનુસાર, બરવાળા અને રાણપુર પોલીસ સ્ટેશનના પોલીસ કર્મચારીઓની બદલી કરવામાં આવી છે. આ ઉપરાંત બોટાદની લોકલ ક્રાઈમ બ્રાંચ અને સ્પેશલ ઓપરેશન ગ્રુપના કર્મચારીઓની ડીજી ઓફિસે બદલી કરી નાંખી છે. ક્રિપાલસિંહ ઝાલાને છોટાઉદેપુર, વનરાજ બોરીચાને બનાસકાંઠા, ભાર્ગવભાઈ રામાનુજની દાહોદ, જયેશ ધાધલની ભુજ, કિરણસિંહ દાયમાની વલસાડ, લગધીરસિંહ ચુડાસમાની આહવા, પ્રદ્યુમનસિંહ વાળાની વ્યારા, ઈંદ્રજિતસિંહ મોરીની નવસારી, નિકુંજ ડાભીની સુરત ગ્રામ્ય, વિજય ધરજીયાની ભરૂચ, પૃથ્વીરાજસિંહ જાદવની પંચમહાલ, નિલેશભાઈ ગલથરાની મહિસાગર બદલી કરવામાં આવી છે.
આ પણ વાંચો...