iran suspends talks us: મધ્ય પૂર્વમાં ફરી એકવાર મહાયુદ્ધના વાદળો ઘેરાઈ રહ્યા છે. ઈઝરાયલ દ્વારા લેબનોનમાં થઈ રહેલા સતત હુમલાઓ અને યુદ્ધવિરામના ભંગને ટાંકીને ઈરાને અમેરિકા સાથે ચાલી રહેલી તમામ વાટાઘાટો અધવચ્ચે અટકાવી દેવાનો મોટો નિર્ણય લીધો છે. આ નિર્ણયથી અમેરિકા અને ઈરાન વચ્ચેનો તણાવ ચરમસીમાએ પહોંચ્યો છે. બંને દેશો એકબીજાના લશ્કરી થાણાઓ પર ડ્રોન તેમજ મિસાઈલથી જોરદાર હુમલા કરી રહ્યા છે. આ ગંભીર પરિસ્થિતિ પર પ્રતિક્રિયા આપતા યુએસ પ્રમુખ ડોનાલ્ડ ટ્રમ્પે સ્પષ્ટ કર્યું છે કે અમેરિકા ઈરાન પર તેની આકરી નાકાબંધી ચાલુ જ રાખશે.
વાટાઘાટો કેમ અટકી અને ઈરાને શું કહ્યું?
અમેરિકા અને ઈરાન વચ્ચે શાંતિ કરારની જે આશા હતી, તેના પર પાણી ફરી વળ્યું છે. બીબીસીએ ઈરાનની સત્તાવાર ન્યૂઝ એજન્સી 'તસ્નીમ' ના હવાલાથી જણાવ્યું છે કે, લેબનોનમાં ઈઝરાયલે છેલ્લા કેટલાક દિવસોથી હુમલાઓ ખૂબ વધારી દીધા છે, જેને ઈરાન યુદ્ધવિરામનું સીધું ઉલ્લંઘન માને છે.
આ મુદ્દે ઈરાનના વિદેશ પ્રધાન અબ્બાસ અરાઘચીએ કડક ચેતવણી આપતા કહ્યું હતું કે, "અમેરિકા અને ઈરાન વચ્ચેનો યુદ્ધવિરામ સ્પષ્ટપણે લેબનોન સહિત તમામ મોરચે લાગુ પડે છે. જો કોઈપણ એક મોરચે આ યુદ્ધવિરામનો ભંગ થશે, તો તેને સંપૂર્ણ ભંગ માનવામાં આવશે. આ ઉલ્લંઘનથી થનારા કોઈપણ ગંભીર પરિણામો માટે અમેરિકા અને ઈઝરાયલ બંને સીધા જવાબદાર રહેશે."
ડોનાલ્ડ ટ્રમ્પનો વળતો જવાબ: "ચૂપ રહેવું વધુ સારું"
ઈરાન દ્વારા વાટાઘાટો સ્થગિત કરવાના અહેવાલો પર અમેરિકાના પ્રમુખ ડોનાલ્ડ ટ્રમ્પે પણ પોતાનું આકરૂં વલણ સ્પષ્ટ કર્યું છે. સોમવારે ટ્રમ્પે કહ્યું કે, તેમને સત્તાવાર રીતે આવી કોઈ માહિતી મળી નથી, પરંતુ જો આ વાત સાચી હોય તો પણ તેમને કોઈ વાંધો નથી.
ટ્રમ્પે સ્પષ્ટ શબ્દોમાં કહ્યું, "મને લાગે છે કે આપણે લોકો જરૂર કરતા વધારે વાત કરી રહ્યા છીએ. હવે ચૂપ રહેવું જ વધુ સારું રહેશે. જોકે, ચૂપ રહેવાનો અર્થ એવો બિલકુલ નથી કે અમે સીધા બોમ્બ જ ફેંકવા માંડીશું; પરંતુ અમે અમારી નાકાબંધી ચોક્કસ ચાલુ રાખીશું અને તે લોખંડ જેવી મજબૂત છે." જ્યારે તેમને પૂછવામાં આવ્યું કે શું તેઓ ઈરાન શાંત થાય ત્યાં સુધી રાહ જોશે? ત્યારે તેમણે કહ્યું, "હું જ્યાં સુધી તેઓ ઈચ્છે ત્યાં સુધી રાહ જોવા તૈયાર છું. તેઓ પહેલેથી જ ઘણું મોટું નુકસાન સહન કરી રહ્યા છે."
આ પણ વાંચોઃ ‘હવે થશે મહાયુદ્ધ, એવી ગોળીઓ છૂટશે કે...’, ટ્રમ્પની ઈરાનને સીધી ધમકી, આરબ દેશોને કરી ખાસ અપીલ
મધ્ય પૂર્વમાં મિસાઈલ અને ડ્રોન હુમલાઓ તેજ બન્યા
વાટાઘાટો તૂટવાની સાથે જ મધ્ય પૂર્વમાં લશ્કરી કાર્યવાહી પણ તેજ બની ગઈ છે:
અમેરિકાની કાર્યવાહી: અમેરિકાએ હોર્મુઝ સ્ટ્રેટમાં આવેલા ઈરાનના ગોરુક અને કેશ્મ ટાપુઓ પર રડાર અને ડ્રોન કંટ્રોલ સ્ટેશનોને નિશાન બનાવીને હુમલા કર્યા છે. યુએસ સેન્ટ્રલ કમાન્ડે દાવો કર્યો છે કે તેમણે ઈરાનની એર ડિફેન્સ સિસ્ટમ, 1 ગ્રાઉન્ડ કંટ્રોલ સ્ટેશન અને 2 ડ્રોનનો નાશ કર્યો છે.
ઈરાનનો પલટવાર: બીજી તરફ ઈરાન પણ ચૂપ બેઠું નથી. IRGC (ઈસ્લામિક રિવોલ્યુશનરી ગાર્ડ કોર્પ્સ) એ હુમલા માટે ઉપયોગમાં લેવાતા અમેરિકન એરબેઝ પર વળતો પ્રહાર કરવાનો દાવો કર્યો છે. ગઈકાલે ઈરાની સૈન્યએ એક અમેરિકન MQ1 ડ્રોનને તોડી પાડ્યું હોવાનું પણ જણાવ્યું છે.
જોકે, ઈરાને કયા યુએસ બેઝ પર હુમલો કર્યો છે તે સ્પષ્ટ નથી કર્યું, પરંતુ તેમણે મિસાઈલ હુમલાનો એક વીડિયો જરૂર બહાર પાડ્યો છે. આ તણાવ વચ્ચે કુવૈતમાં પણ ઈરાની હુમલાની ચેતવણી આપતા સાયરન વાગવા લાગ્યા છે, જે દર્શાવે છે કે સ્થિતિ કોઈપણ ક્ષણે ભયાનક સ્વરૂપ લઈ શકે છે.
આ પણ વાંચોઃ US-ઈરાન ડીલ પર ટ્રમ્પનું સસ્પેન્સ, પણ હોર્મુઝ સ્ટ્રેટ પર ઈરાને મોટો દાવ રમ્યો, ટોલ નહીં પણ ટેક્સ....