Israel-Palestine war: છેલ્લા એક અઠવાડિયાથી ઇઝરાયેલ અને હમાવ વચ્ચે ભીષણ યુદ્ધ ચાલી રહ્યું છે. ઈઝરાયેલ અને પેલેસ્ટાઈન વચ્ચેના યુદ્ધ સતત લાંબુ ચાલતું હોવાથી ઈરાન અને લેબેનોન જેવા દેશો પણ આ યુદ્ધમાં જોડાય તેવી શક્યતા વધી છે, જો આમ થશે તો ભારતમાં લોકોને વધુ મોંઘવારીનો સામનો કરવો પડી શકે છે. નોંધનીય છે કે રશિયા અને યૂક્રેન યુદ્ધના કારણે વૈશ્વિક સ્તરે ઘઉં, ચોખા અને અન્ય ખાદ્ય પદાર્થોના ભાવમાં વધારો જોવા મળ્યો હતો. હવે ભારતમાં વધુ એક મોંઘવારી આવશે, જાણો ડિટેલ્સ...
હવે ઈઝરાયેલ અને પેલેસ્ટાઈન વચ્ચેના યુદ્ધને કારણે વૈશ્વિક ક્રૂડ ઓઈલનો પુરવઠો લોકોના ઘરનું બજેટ બગાડી શકે છે. આનાથી સંબંધિત ઉત્પાદનોના ભાવમાં તીવ્ર વધારો થવાની સંભાવના છે. ગત સપ્તાહ દરમિયાન ક્રૂડ ઓઈલના સપ્લાયને અસર થઈ હતી અને તેની કિંમતમાં વધારો થયો હતો. શુક્રવારે બ્રેન્ટ ક્રૂડ 2 ડોલર વધીને પ્રતિ બેરલ 87 ડોલરની નજીક પહોંચી ગયું હતું.
હજુ પણ વધી શકે છે ક્રૂડ ઓઇલ -
એવી આશંકા છે કે ઈરાન પણ આ હુમલામાં ભાગ લઈ શકે છે. ઈરાન ક્રૂડ ઓઈલનો મોટો ઉત્પાદક દેશ છે. આવી સ્થિતિમાં આવનારા સમયમાં કાચા તેલની કિંમતો વધુ વધી શકે છે. આવી સ્થિતિમાં ક્રૂડ ઓઇલ પર નિર્ભર ઉત્પાદનોની કિંમતો વધી શકે છે.
કઇ વસ્તુઓના વધી શકે છે ભાવ
બિઝનેસ ટૂડે અનુસાર, નિષ્ણાતો માને છે કે જો યુદ્ધ હજુ થોડા દિવસો સુધી ચાલુ રહેશે તો અશ્મિભૂત ઇંધણ પર નિર્ભર ચીજવસ્તુઓના ભાવ ઝડપથી વધશે. એવું કહેવામાં આવી રહ્યું છે કે સ્માર્ટ ટેલિવિઝન, વૉશિંગ મશીન અને અન્ય વસ્તુઓની કિંમતોમાં વધારો થવાની સંભાવના છે.
તહેવારોની સિઝનમાં નહીં વધે ભાવ
તહેવારોની સિઝનમાં ભારતીય બજારમાં આ વસ્તુઓનો સ્ટૉક પૂરતા પ્રમાણમાં ઉપલબ્ધ છે, જેના કારણે તેની કિંમતો સ્થિર રહેશે. જોકે આ પછી સામાનના ભાવમાં વધારો જોવા મળી શકે છે. કાચા માલના સપ્લાય પર અસરને કારણે પ્લાસ્ટિક અને અન્ય વસ્તુઓના ભાવ વધી શકે છે.
ડેઇલી યૂઝની વસ્તુઓ પણ વધી શકે છે
યુદ્ધની અસર રોજિંદા ઉપયોગની વસ્તુઓ પર પણ જોવા મળી શકે છે. FMCG સેક્ટરમાં સામાનના ભાવમાં વધારો થઈ શકે છે. નોંધનીય છે કે દેશમાં FMCG કંપનીઓ પહેલેથી જ ઓછી માંગ સાથે સંઘર્ષ કરી રહી છે.