Weather Updates: દેશભરમાં બદલાયો મૌસમનો મિજાજ, આ રાજ્યમાં કરા અને પવન સાથે વરસાદની આગાહી

ઉત્તર પ્રદેશ, બિહાર, રાજસ્થાન, મધ્યપ્રદેશ જેવા ઉત્તરીય રાજ્યોમાં ગરમીની નોંધપાત્ર અસર જોવા મળી રહી છે. દિવસ દરમિયાન આકરા તડકાના કારણે લોકોનું જીવન મુશ્કેલ બની ગયું છે. જો કે થોડા દિવસો માટે દેશની વેધર પેટર્ન બદલાવાની છે.

ભારતીય હવામાન વિભાગ અનુસાર, આગામી 24 કલાકમાં મધ્યપ્રદેશ, છત્તીસગઢ, વિદર્ભ, મરાઠવાડા અને મધ્ય મહારાષ્ટ્રમાં ગાજવીજ સાથે હળવાથી મધ્યમ વરસાદની આગાહી કરવામાં આવી છે. આ સમયગાળા દરમિયાન 30 થી 50 કિમી પ્રતિ કલાકની ઝડપે ભારે પવન ફૂંકાઈ શકે છે.

હવામાન વિભાગે જણાવ્યું છે કે, શનિવારે ગંગાના પશ્ચિમ બંગાળ, બિહાર, ઝારખંડ, ઓડિશા અને આંદામાન અને નિકોબાર ટાપુઓમાં ગાજવીજ સાથે હળવાથી મધ્યમ વરસાદની અપેક્ષા છે. વિદર્ભના કેટલાક ભાગોમાં ભારે પવન સાથે વીજળી પડવાની સંભાવના છે.

જમ્મુ-કાશ્મીર, હિમાચલ પ્રદેશ, પંજાબ, હરિયાણા-ચંદીગઢ અને મધ્ય પ્રદેશમાં ગાજવીજ અને ભારે પવન સાથે વરસાદ થઇ શકે છે. 40-50 કિમી પ્રતિ કલાકની ઝડપે પવન સાથે આ રાજ્યોના કેટલાક વિસ્તારોમાં કરા પણ પડી શકે છે.

હવામાન વિભાગે કહ્યું છે કે, ઉત્તરાખંડ, પશ્ચિમી ઉત્તર પ્રદેશ, મધ્ય મહારાષ્ટ્ર, તેલંગાણા, કર્ણાટક, લક્ષદ્વીપમાં વીજળીની સાથે જોરદાર પવન ફૂંકાઈ શકે છે. છત્તીસગઢ, અરુણાચલ પ્રદેશ, આસામ, મેઘાલય, કોસ્ટલ કર્ણાટક જેવા રાજ્યોમાં ગાજવીજ સાથે વીજળી પડવાની સંભાવના છે.

વેસ્ટર્ન ડિસ્ટર્બન્સની અસર દિલ્હી-NCRમાં જોવા મળશે, જેના કારણે મહત્તમ તાપમાન 35 ડિગ્રીથી નીચે આવી શકે છે. ભારે પવન સાથે દિવસમાં વાતાવરણ વાદળછાયું રહેશે. IMD દ્વારા પણ વરસાદની શક્યતા વ્યક્ત કરવામાં આવી છે. હવામાન વિભાગે યલો એલર્ટ પણ જાહેર કર્યું છે.