ભારતનું એટેક હેલિકોપ્ટર ઉડાડીને દુનિયાને પોતાની તાકાત બતાવી રહ્યું છે તાલિબાન, પાકિસ્તાનની ઊંઘ હરામ થઈ ગઈ?

તાલિબાને બુધવારે (14 ઓગસ્ટ) પોતાની આર્મી પરેડમાં ભારતનું એમઆઈ 24 એટેક હેલિકોપ્ટર ઉડાડીને પાકિસ્તાનની ચિંતા વધારી દીધી છે. ભારતનું હેલિકોપ્ટર આકાશમાં ઉડાડીને તાલિબાને દુનિયા સામે પોતાની તાકાતનું પ્રદર્શન કર્યું.

ભારતે આવા છ હેલિકોપ્ટર અફઘાનિસ્તાન સરકારને ભેટમાં આપ્યા હતા. પહેલા ચાર હેલિકોપ્ટર 2016માં આપવામાં આવ્યા હતા અને બાકીના બે એમઆઈ 24 એટેક હેલિકોપ્ટર 2019માં આપવામાં આવ્યા હતા. જ્યારે આ હેલિકોપ્ટર આપવામાં આવ્યા હતા ત્યારે અફઘાનિસ્તાનમાં તાલિબાનનું શાસન નહોતું.

આ સાથે ભારતે અફઘાનિસ્તાનને હેલિકોપ્ટરની જાળવણી અને ઉડાન ભરવાની તાલીમની પણ વ્યવસ્થા કરી આપી હતી. હવે પોતાની પરેડમાં આ એટેક હેલિકોપ્ટરોનું પ્રદર્શન કરીને તાલિબાન પોતાની તાકાતનું પ્રદર્શન કરી રહ્યું છે.

આ સમયે અફઘાનિસ્તાનની સત્તામાં તાલિબાન છે એટલે આ હથિયારો પર પણ તેનો જ કબજો છે.

અફઘાનિસ્તાન પર તાલિબાનના કબજાને ત્રણ વર્ષ પૂરા થયા છે અને તે બુધવારે આ જ વાતની ઉજવણી કરી રહ્યું હતું.

14 ઓગસ્ટે તાલિબાને આર્મી પરેડ કાઢી જેમાં તે દુનિયાને પોતાની સૈન્ય તાકાત અને હથિયારોનું પ્રદર્શન કરી રહ્યું હતું.