Virat Kohli B'Day: વિરાટની ઇન્ટરનેશનલ કેરિયરની 10 યાદગાર પળોની તસવીરો....

Virat Kohli Top 10 Moments: આજે ભારતીય ટીમના સ્ટાર બેટ્સમેન અને રન મશીન વિરાટ કોહલીનો જન્મદિવસ છે. વિરાટ આજે 35 વર્ષનો થયો છે. તેને છેલ્લા 15 વર્ષ આંતરરાષ્ટ્રીય ક્રિકેટને સમર્પિત કર્યા છે. આ સમયગાળા દરમિયાન તેની 10 યાદગાર પળોની તસવીરો અહીં લઇને આવ્યા છીએ. જુઓ...

વિરાટ કોહલીએ ડિસેમ્બર 2009માં પોતાની પ્રથમ આંતરરાષ્ટ્રીય સદી ફટકારી હતી. તેને કોલકાતાના ઈડન ગાર્ડન્સ ખાતે શ્રીલંકા સામે 114 બૉલમાં 107 રનની ઈનિંગ રમી હતી.

વર્લ્ડકપ 2011ની ફાઇનલમાં તેને નાની પરંતુ મહત્વની ઇનિંગ્સ રમીને ટીમ ઇન્ડિયાની જીતમાં ખાસ ભૂમિકા ભજવી હતી. સચિન અને સેહવાગના વહેલા આઉટ થયા બાદ તેણે 35 રન બનાવ્યા અને ગૌતમ ગંભીર સાથે મળીને ત્રીજી વિકેટ માટે 83 રન જોડ્યા.

ઓસ્ટ્રેલિયામાં ટેસ્ટ સદી ફટકારવાનું દરેક ભારતીય ક્રિકેટરનું સપનું હોય છે. વિરાટ કોહલીએ આ સપનું જાન્યુઆરી 2012માં પૂરું કર્યું હતું. તેને ઓસ્ટ્રેલિયા સામે એડિલેડમાં 116 રનની ઇનિંગ રમી હતી.

T20 વર્લ્ડકપ 2016માં વિરાટ કોહલીએ ટીમ ઈન્ડિયાને સેમીફાઈનલમાં યાદગાર એન્ટ્રી અપાવી હતી. તેને મોહાલીમાં ઓસ્ટ્રેલિયા સામે 51 બૉલમાં અણનમ 82 રન ફટકારીને ભારતને અંતિમ-4માં પહોંચાડ્યું હતું.

2014ના ઈંગ્લેન્ડ પ્રવાસમાં વિરાટ ખરાબ રીતે નિષ્ફળ ગયો હતો. આ અંગે તેમને કેટલીય ટીકાઓનો સામનો કરવો પડ્યો હતો. આ પછી 2018 માં તેને ઇંગ્લેન્ડ પ્રવાસની ટેસ્ટ સીરીઝની 10 ઇનિંગ્સમાં બે સદી અને ત્રણ અડધી સદીની મદદથી 593 રન બનાવીને ટીકાકારોને જવાબ આપ્યો.

ભારતે 2018-19માં પ્રથમ વખત ઓસ્ટ્રેલિયામાં ટેસ્ટ સીરીઝ જીતી હતી. તે સમયે ટીમ ઈન્ડિયાનો કેપ્ટન વિરાટ કોહલી હતો. પોતાના નવા નેતૃત્વમાં તેણે ટીમ ઈન્ડિયાને 2-1થી જીત અપાવી. ટીમ ઈન્ડિયા અને વિરાટ માટે આ ઐતિહાસિક ક્ષણ હતી.

વર્લ્ડકપ 2019માં ભારત-ઓસ્ટ્રેલિયાની મેચ દરમિયાન ભારતીય ચાહકો 2018ના બૉલ ટેમ્પરિંગ કેસને લઈને સ્ટીવ સ્મિથ પર બૂમ પાડી રહ્યા હતા. અહીં વિરાટ કોહલી તેના સમર્થનમાં આવ્યો અને ફેન્સને આ બધું બંધ કરવા કહ્યું.

સપ્ટેમ્બર 2019માં વિરાટ ટેસ્ટ મેચ જીતવાના મામલે સૌથી સફળ કેપ્ટન બન્યો. તેને એમએસ ધોનીના 27 ટેસ્ટ જીતના રેકોર્ડને પાછળ છોડી દીધો હતો.

વર્ષ 2019 પછી વિરાટ કોહલી લગભગ અઢી વર્ષ સુધી એક પણ સદી ફટકારી શક્યો ન હતો. તેને એશિયા કપ 2022માં અફઘાનિસ્તાન સામેની મેચમાં આ ક્રમ તોડ્યો હતો. આ મેચમાં તેણે 61 બૉલમાં 122 રન બનાવ્યા હતા. આ તેના માટે યાદગાર ક્ષણ હતી.

T20 વર્લ્ડકપ 2022માં વિરાટે મેલબોર્ન ક્રિકેટ ગ્રાઉન્ડ પર પોતાની કારકિર્દીની યાદગાર ઇનિંગ રમી હતી. તેને ગ્રુપ સ્ટેજની મેચમાં પાકિસ્તાન સામે 53 બૉલમાં 82 રનની અણનમ ઈનિંગ રમીને ટીમ ઈન્ડિયાને જીત અપાવી હતી. આ જીત ખાસ હતી કારણ કે એક સમયે ટીમ ઈન્ડિયા 31 રનમાં 4 વિકેટ ગુમાવ્યા બાદ મુશ્કેલીમાં હતી. અહીંથી વિરાટે હાર્દિક પંડ્યા સાથે મળીને ભારતને 160 રનના લક્ષ્યાંકનો પીછો કર્યો હતો.