HK vs PAK, Match Highlight:પાકિસ્તાને હોંગકોંગને 155 રને હરાવ્યું, સુપર-4માં ભારત સાથે  મુકાબલો

પાકિસ્તાને હોંગકોંગને ખરાબ રીતે હરાવ્યું. તેણે આ મેચ 155 રનથી જીતી લીધી હતી. આ જીત બાદ પાકિસ્તાનનો આગામી મુકાબલો ભારત સામે થશે.

Pakistan vs Hong Kong Asia Cup 2022: એશિયા કપ 2022ની છઠ્ઠી મેચમાં પાકિસ્તાને હોંગકોંગને ખરાબ રીતે હરાવ્યું. તેણે આ મેચ 155 રનથી જીતી લીધી હતી. આ જીત બાદ પાકિસ્તાનનો આગામી મુકાબલો ભારત સામે થશે. ભારત અને પાકિસ્તાનની ટીમો 4 સપ્ટેમ્બરે સુપર-4 મેચમાં સામસામે ટકરાશે. હોંગકોંગ સામે પાકિસ્તાન તરફથી શાદાબ ખાન, નસીમ શાહ અને મોહમ્મદ નવાઝે શાનદાર બોલિંગ કરી હતી. તે જ સમયે, મોહમ્મદ રિઝવાને શાનદાર બેટિંગ કરી હતી. 

 

પાકિસ્તાને આપેલા ટાર્ગેટનો પીછો કરતા હોંગકોંગની ટીમ 10.4 ઓવરમાં માત્ર 38 રનમાં સમેટાઈ ગઈ હતી. ટીમ માટે કેપ્ટન નિજકત ખાન અને યાસીમ મોર્તઝા ઓપનિંગ કરવા આવ્યા હતા. નિજકત માત્ર 8 રન બનાવીને આઉટ થયો હતો અને મુર્તઝાએ 2 રન બનાવ્યા હતા. બાબર હયાત ખાતું પણ ખોલાવી શક્યો નહોતો અને શૂન્ય પર પેવેલિયન પરત ફર્યો હતો. કિંચિત શાહે 10 બોલમાં 6 રન બનાવ્યા હતા. એજાઝ ખાન 1 રન અને સ્કોટ મેકેની 4 રન બનાવીને આઉટ થયા હતા. તેવી જ રીતે આખી ટીમ ઓલઆઉટ થઈ ગઈ હતી.

પાકિસ્તાન તરફથી શાદાબ ખાને શાનદાર બોલિંગ કરી હતી. તેણે 2.4 ઓવરમાં માત્ર 8 રન આપીને 4 વિકેટ ઝડપી હતી. મોહમ્મદ નવાઝે 2 ઓવરમાં 5 રન આપીને 3 વિકેટ લીધી હતી. નસીમ શાહે 2 ઓવરમાં 7 રન આપીને 2 વિકેટ લીધી હતી. શાહનવાઝ દહાનીએ 2 ઓવરમાં 7 રન આપીને એક વિકેટ લીધી હતી. તેણે મેડન ઓવર પણ નાખી હતી.

પાકિસ્તાને 20 ઓવરમાં 2 વિકેટ ગુમાવીને 193 રન બનાવ્યા હતા. આ દરમિયાન ટીમ માટે મોહમ્મદ રિઝવાને અણનમ 78 રન બનાવ્યા હતા. રિઝવાને 6 ફોર અને 1 સિક્સર ફટકારી હતી. કેપ્ટન બાબર આઝમ 9 રન બનાવીને આઉટ થયો હતો. ફખર ઝમાને 41 બોલમાં 53 રન બનાવ્યા હતા. ખુશદિલે અંતમાં તોફાની ઇનિંગ્સ રમી હતી. તેણે 15 બોલમાં અણનમ 35 રન બનાવ્યા હતા.

આ પણ વાંચો.....