WTC 2023 Final IND vs AUS: વર્લ્ડ ટેસ્ટ ચેમ્પિયનશિપ ફાઇનલમાં હાર બાદ ભારતને વધુ એક આંચકો લાગ્યો છે. ICCએ સ્લો ઓવર રેટ બદલ ટીમ ઈન્ડિયા પર સંપૂર્ણ મેચ ફીનો દંડ લગાવ્યો છે. ભારતની સાથે ઓસ્ટ્રેલિયાને પણ દંડ ફટકારવામાં આવ્યો છે. આઇસીસીએ ટ્વીટ કરીને આ અંગેની જાણકારી આપી હતી. લંડનના ઓવલમાં રમાયેલી ફાઈનલ મેચમાં ભારતને 209 રનથી હારનો સામનો કરવો પડ્યો હતો. આ મેચમાં ટીમ ઈન્ડિયાની બેટિંગ લાઈન અપ ફ્લોપ સાબિત થઈ હતી.
ફાઇનલમાં સ્લો ઓવર રેટ બદલ ભારતને સંપૂર્ણ મેચ ફીનો દંડ ફટકારવામાં આવ્યો છે. જ્યારે ઓસ્ટ્રેલિયાને મેચ ફીના 80 ટકા દંડ ફટકારવામાં આવ્યો છે. ટીમ ઈન્ડિયા ટાર્ગેટ સમય કરતાં 5 ઓવર પાછળ હતી. જ્યારે ઓસ્ટ્રેલિયન ટીમ 4 ઓવર પાછળ હતી. આના કારણે ટીમ ઈન્ડિયાના ખેલાડીઓને પણ નુકસાન થયું છે. આઇસીસીએ શુભમન ગિલને દંડ પણ ફટકાર્યો છે. તેના પર મેચ ફીના 15 ટકા દંડ ફટકારવામાં આવ્યો છે.
ઉલ્લેખનીય છે કે ફાઇનલમાં ભારતને ખરાબ રીતે હારનો સામનો કરવો પડ્યો હતો. આ મેચમાં ઓસ્ટ્રેલિયાએ પ્રથમ દાવમાં 469 રન બનાવ્યા હતા. આ પછી ટીમે 270 રન બનાવીને બીજો દાવ ડિકલેર કર્યો હતો. ટીમ ઈન્ડિયાએ પ્રથમ દાવમાં 296 રન અને બીજા દાવમાં 234 રન બનાવ્યા હતા. આ રીતે ટીમ ઈન્ડિયાને 209 રનથી હારનો સામનો કરવો પડ્યો હતો. આ મેચની બીજા દાવમાં શુભમન ગિલને આઉટ આપવાનો નિર્ણય ખૂબ વિવાદાસ્પદ રહ્યો હતો. તેના કેચને લઈને અનેક સવાલો ઉભા થયા હતા.
ભારતીય ઓપનર ગિલ ફાઈનલ મેચની પ્રથમ ઈનિંગમાં માત્ર 13 રન બનાવીને આઉટ થઈ ગયો હતો. રોહિત 15 રન બનાવીને અને પૂજારા 14 રન બનાવીને આઉટ થયો હતો. કોહલી પણ 14 રન બનાવીને આઉટ થયો હતો. ભરતે 5 રન બનાવ્યા હતા. બીજા દાવમાં ગિલ 18 રન બનાવીને આઉટ થયો હતો. પૂજારા 27 રન બનાવીને આઉટ થયો હતો. રવિન્દ્ર જાડેજા ખાતું પણ ખોલાવી શક્યો ન હતો. ટીમ ઈન્ડિયાની હાર માટે ખરાબ બેટિંગ પ્રદર્શન મોટાભાગે જવાબદાર રહ્યું હતું.