રવિવાર 13 ફેબ્રુઆરી ભારતીય ઓલરાઉન્ડર શિવમ દુબે માટે બેવડી ખુશખબરી લઈને આવ્યો છે. સવારે તેનું ઘર ખુશીઓથી ગુંજી ઉઠ્યું. શિવમ દુબેના ઘરે દિકરાનો જન્મ થયો છે. તે જ સમયે, બપોરે ચેન્નઈ સુપર કિંગ્સે કરોડો રૂપિયા ખર્ચીને તેને પોતાની ટીમમાં સામેલ કર્યા. શિવમે હરાજી માટે તેની મૂળ કિંમત 50 લાખ રૂપિયા રાખી હતી. મહેન્દ્ર સિંહ ધોનીની આગેવાની હેઠળની ટીમે તેને 4 કરોડ રૂપિયામાં ખરીદ્યો હતો.
શિવમ દુબેએ 16 જુલાઈ 2021ના રોજ ગર્લફ્રેન્ડ અંજુમ ખાન સાથે લગ્ન કર્યા. અંજુમે રવિવારે પુત્રને જન્મ આપ્યો હતો. IPL ઓક્શનમાં લખનઉ સુપર જાયન્ટ્સે શિવમ માટે પહેલી બોલી લગાવી હતી. તેની રાજસ્થાન રોયલ્સે રૂ. 65 લાખ સુધીની બોલી લગાવી હતી. રાજસ્થાનની વાપસી બાદ લખનઉ અને પંજાબ કિંગ્સ વચ્ચે સ્પર્ધા હતી. લખનઉની ટીમે બે કરોડની બોલી લગાવ્યા બાદ પોતાને દૂર કર્યા હતા.
આઈપીએલ 2022 હરાજીનો આજે બીજો દિવસ છે. મેગા ઓક્શનના બીજા દિવસે અનેક ખેલાડીઓ પર પૈસાનો વરસાદ થયો છે, જ્યારે ટી20 ક્રિકેટના સ્ટાર કહેવાતા કેટલાક ખેલાડીને ખરીદવામાં કોઈએ રસ દાખવ્યો નથી. અંડર-19 ટીમના ખેલાડીઓ પણ હરાજીમાં સામેલ થયા છે.
અંડર-19 ટીમનો કેપ્ટન યશ ધૂલે કેટલામાં વેચાયો
ભારતને તાજેતરમાં અંડર-19 વર્લ્ડકપ વિજેતા બનાવનારો કેપ્ટન યશ ધૂલે 50 લાખમાં વેચાયો છે. દિલ્હી કેપિટલ્સે તેને કરાર બદ્ધ કર્યો છે. યશ ધૂલેની કેપ્ટનશિપમાં ભારત પાંચમી વખત અંડર-19 વર્લ્ડકપ વિજેતા બન્યું હતું.
IPLમાં ઇગ્લેન્ડનો બીજો સૌથી મોંઘો ખેલાડી બન્યો લિયામ લિવિંગસ્ટોન
IPL 2022 ના મેગા ઓક્શનના બીજા દિવસે અનેક ખેલાડીઓ પર પૈસાનો વરસાદ થયો છે. મેગા ઓક્શનના બીજા દિવસે ઈંગ્લેન્ડના ઓલરાઉન્ડર લિયામ લિવિંગસ્ટોનને ખરીદવા ટીમો વચ્ચે જંગ જામ્યો હતો. તેને ખરીદવા માટે કોલકાતા નાઈટ રાઈડર્સ, પંજાબ કિંગ્સ, ગુજરાત ટાઈટન્સ અને સનરાઈઝર્સ હૈદરાબાદ વચ્ચે જોરદાર સ્પર્ધા ચાલી હતી. જો કે અંતે પંજાબ કિંગ્સે આ તોફાની બેટ્સમેનને 11.50 કરોડમાં ખરીદ્યો હતો. લિયામ લિવિંગસ્ટોન અગાઉ IPLમાં રાજસ્થાન રોયલ્સ તરફથી પણ રમી ચૂક્યો છે. લિવિંગસ્ટોન અગાઉ બેન સ્ટોક્સ IPLમાં ખરીદાયેલો સૌથી મોંઘો ઈંગ્લિશ ખેલાડી છે.