ભારતીય ક્રિકેટર લોકેશ રાહુલ પોતાના ખરાબ ફોર્મના કારણે સતત ચર્ચામાં રહે છે. તે લાંબા સમયથી દેશ માટે મોટી ઇનિંગ રમી શક્યો નથી અને ઇન્દોર ટેસ્ટમાં તેને ટીમમાંથી બહાર કરી દેવામાં આવ્યો હતો. તેના સ્થાને શુભમન ગિલને તક આપવામાં આવી હતી, પરંતુ ગિલ પણ બંને ઇનિંગ્સમાં કંઈ ખાસ કરી શક્યો નહોતો. આ દરમિયાન લોકેશ રાહુલ પોતાના નિવેદનને કારણે ફરી ચર્ચામાં આવ્યો છે. લોકેશ રાહુલે તેની આઈપીએલ ટીમ લખનઉ સુપર જાયન્ટ્સની નવી જર્સી લોન્ચ દરમિયાન કહ્યું કે સ્ટ્રાઈક રેટ પર વધુ ભાર મૂકવામાં આવે છે.
રાહુલના આ નિવેદન બાદ ફેન્સ સોશિયલ મીડિયા પર પોતાની પ્રતિક્રિયા આપી રહ્યા છે. તેના ખરાબ સ્ટ્રાઈક રેટને કારણે કેટલાક લોકો તેને ટ્રોલ કરી રહ્યા છે. ઘણા લોકો તેમના નિવેદન સાથે સહમત છે.
જર્સી લોન્ચ ઈવેન્ટમાં લોકેશ રાહુલને પૂછવામાં આવ્યું હતું કે T20 ક્રિકેટમાં સ્ટ્રાઈક રેટ કેટલો મહત્વનો છે. તેના પર તેણે કહ્યું કે બેટ્સમેને કયા સ્ટ્રાઈક રેટ પર રમવાનું છે, તે લક્ષ્ય પર નિર્ભર કરે છે. "મને લાગે છે કે સ્ટ્રાઈક રેટ ઓવરરેટેડ છે. પરંતુ તે પરિસ્થિતિ પર આધાર રાખે છે, જેમ કે જો તમે 140નો પીછો કરી રહ્યા હોવ તો તમારે 200 સ્ટ્રાઈક પર રમવાની જરૂર નથી. તે વર્તમાન પરિસ્થિતિ પર નિર્ભર કરે છે.
જર્સી લોન્ચ ઈવેન્ટમાં લખનઉ ફ્રેન્ચાઈઝીના મેન્ટર ગૌતમ ગંભીરે પણ હાજરી આપી હતી. રાહુલ વિશે વાત કરતાં ગંભીરે કહ્યું કે ટીમ નસીબદાર છે કે તેના જેવો 'સ્થિર નેતૃત્વ ધરાવતો’ કેપ્ટન છે.
ભારતીય ટીમમાં રાહુલના સ્થાન પર છેલ્લા કેટલાક મહિનાઓથી સવાલ ઉઠી રહ્યા છે. લોકેશ રાહુલ રમતના ત્રણેય ફોર્મેટમાં સતત પ્રદર્શન કરી શક્યો નથી.
આઈપીએલમાં રાહુલનો રેકોર્ડ શાનદાર છે. ટી20 લીગની 109 મેચોમાં ઓપનરે 48.01ની એવરેજ અને 136.22ની સ્ટ્રાઈક રેટથી 3889 રન બનાવ્યા છે. રાહુલ IPLમાં સાતત્યપૂર્ણ પ્રદર્શન કરે છે પરંતુ તે અત્યાર સુધી જે ચાર ફ્રેન્ચાઈઝી માટે રમ્યો છે તેમાંથી કોઈપણ સાથે તેણે T20 ટ્રોફી જીતી નથી.