IPL 2023, RC vs DC: IPLની આજે પ્રથમ મેચમાં રાજસ્થાન રોયલ્સ અને દિલ્હી કેપિટલ્સ આમને-સામને થશે. આ મેચ ગુવાહાટીના બારસપારા ક્રિકેટ સ્ટેડિયમમાં બપોરે 3.30 કલાકે શરૂ થશે. આ મેચ માટે રાજસ્થાનનું પલડું ભારે હોય તેવું લાગી રહ્યું છે. કારણ કે આ ટીમે IPL 2023ની શરૂઆત જબરદસ્ત રીતે કરી છે, જ્યારે દિલ્હી કેપિટલ્સની શરૂઆત નબળી રહી છે.
IPLની આ સિઝનમાં રાજસ્થાન રોયલ્સ અત્યાર સુધીમાં બે મેચ રમી ચૂકી છે. પ્રથમ મેચમાં તેણે SRHને 72 રનથી હરાવ્યું હતું, જ્યારે બીજી મેચમાં તેને પંજાબ કિંગ્સ સામે માત્ર 5 રનથી હારનો સામનો કરવો પડ્યો હતો. પંજાબ કિંગ્સ સામેની હાર છતાં રાજસ્થાનની ટીમ જે રીતે રમી, તેનાથી આ ટીમના બીજા ઘણા ગુણો સામે આવ્યા.
દિલ્હીની ટીમ આ આઈપીએલ સિઝનની તેની બંને મેચો એકતરફી રીતે હારી ગઈ છે. પ્રથમ મેચમાં, તેઓ લખનૌ દ્વારા 50 રને પરાજય પામ્યા હતા, જ્યારે બીજી મેચમાં, ગુજરાત ટાઇટન્સે તેમને 11 બોલ બાકી રહેતા 6 વિકેટે પરાજય આપ્યો હતો. આ બંને મેચમાં દિલ્હી કેપિટલ્સના ખેલાડીઓની લડાઈ કૌશલ્ય જરા પણ દેખાઈ ન હતી.
રાજસ્થાનની ટીમમાં સારું સંતુલન
રાજસ્થાન રોયલ્સની આખી ટીમ સારી લયમાં જોવા મળી રહી છે, સાથે જ આ ટીમમાં બોલિંગ અને બેટિંગનું પણ સારું સંતુલન છે. રાજસ્થાન રોયલ્સ પાસે 9મા ક્રમ સુધી બેટિંગનો વિકલ્પ છે. આ ટીમમાં ઓપનિંગથી લઈને મિડલ ઓર્ડર અને ફિનિશિંગ સુધી દરેક પોઝિશન માટે ઝડપી બેટ્સમેન છે. બોલિંગમાં સ્પિન વિભાગમાં ચહલ અને અશ્વિનની દિગ્ગજ જોડી છે, જ્યારે ફાસ્ટ બોલિંગમાં ટ્રેન્ટ બોલ્ટ જેવો ખતરનાક બોલર છે. ફાસ્ટ બોલિંગમાં બોલ્ટને સપોર્ટ કરવા માટે જેસન હોલ્ડર અને કેએમ આસિફ જેવા બોલર પણ છે. હાલમાં આ ટીમના તમામ ખેલાડીઓ સારી લયમાં જોવા મળી રહ્યા છે.
દિલ્હીની બેટિંગ અને ફિલ્ડિંગ ફ્લોપ રહી હતી
દિલ્હીમાં ધૂરંધર ખેલાડીઓ છે પરંતુ હાલમાં તેઓ લયમાં નથી. વોર્નરથી લઈને પૃથ્વી શો, રિલે રોસુ અને રોવમેન પોવેલ જેવા અનુભવીઓનું બેટ શાંત છે. ત્યારે મિચેલ માર્શ પણ આજની મેચમાં આ ટીમમાં નહીં હોય. બોલિંગમાં, આ ટીમ ફાસ્ટ અને સ્પિન વિભાગમાં સારું સંતુલન ધરાવે છે, પરંતુ ખરાબ ફિલ્ડિંગને કારણે બોલિંગ ફ્લોપ દેખાઈ રહી છે.
એકંદરે, બંને ટીમોના મોમેન્ટમ, ખેલાડીઓનું ફોર્મ અને પ્લેઇંગ-11 કોમ્બિનેશનને જોતા એવું કહી શકાય કે રાજસ્થાન રોયલ્સ ટીમ આજની મેચમાં જીત નોંધાવી શકે છે.