Indian Premier League 2023: આઈપીએલની આ સિઝનની શરૂઆત મુંબઈ ઈન્ડિયન્સ માટે સારી રહી ન હતી. જોકે, ટીમે બીજા હાફમાં શાનદાર વાપસી કરીને હવે ટોપ-4માં પોતાનું સ્થાન બનાવી લીધું છે. મુંબઈ ઈન્ડિયન્સના આ કમબેકનો સૌથી મોટો શ્રેય સૂર્યકુમાર યાદવના શાનદાર ફોર્મને જાય છે. ગુજરાત ટાઇટન્સ સામેની મેચમાં સૂર્યાએ તેની IPL કારકિર્દીની પ્રથમ સદી પણ ફટકારી હતી.
સૂર્યકુમારે ગુજરાત સામેની મેચમાં 49 બોલમાં 103 રનની ઇનિંગ રમી હતી. આ દરમિયાન સૂર્યાના બેટમાંથી એક શાનદાર શોટ જોવા મળ્યો હતો. મુંબઈ ઈન્ડિયન્સ ટીમના મેન્ટર અને ઓલ ટાઈમ ગ્રેટ પ્લેયર સચિન તેંડુલકરની પ્રતિક્રિયા પણ તેના એક શોટ પર વાયરલ થઈ હતી. મોહમ્મદ શમીના બોલ પર સૂર્યાએ થર્ડ મેન પર આ શોટ લગાવ્યો હતો, જે સીધો સિક્સર પર ગયો હતો.
હવે સૂર્યકુમાર યાદવે સચિન તેંડુલકરની (Sachin Tendulkar) આ પ્રતિક્રિયા પર જિયો સિનેમા (Jio Cinema) પર પોતાના નિવેદનમાં કહ્યું કે મેં આ શૉટ રમવાની પ્રેક્ટિસ મારા મગજમાં ઘણી વખત કરી છે. હું હંમેશા મેદાન પ્રમાણે શોટ રમવાનો પ્રયત્ન કરું છું. તે સમયે જ્યારે બોલ ભીનો થઈ ગયો ત્યારે બોલરો પાસે બહુ ઓછા વિકલ્પો હતા.
સૂર્યાએ વધુમાં કહ્યું કે હું જાણતો હતો કે તે હવે યોર્કર બોલ કરવાનો પ્રયાસ કરશે અને હું તેના માટે સંપૂર્ણ રીતે તૈયાર હતો. હું તેની સામે પહેલા પણ રમ્યો હતો અને આ પહેલા પણ મેં આ શોટ રમ્યો હતો, પરંતુ તે સમયે તે એટલું શાનદાર નહોતું. તે શોટ પોઈન્ટ તરફ ગયો.
આ સિઝનમાં અત્યાર સુધીમાં સૂર્યાના બેટથી 479 રન થયા છે.
સીઝનની પ્રથમ 3 ઇનિંગ્સમાં સૂર્યકુમારના બેટમાંથી માત્ર 16 રન જોવા મળ્યા હતા. આ પછી, સૂર્યાએ આગલી 9 ઇનિંગ્સમાં 4 અડધી સદી અને 1 સદી ફટકારીને શ્રેષ્ઠ રીતે વાપસી કરી. આ સિઝનમાં અત્યાર સુધી સૂર્યકુમારે 12 ઇનિંગ્સમાં 43.55ની એવરેજથી 479 રન બનાવ્યા છે અને તે ઓરેન્જ કેપની યાદીમાં 5માં સ્થાને છે.