Suryakumar Yadav IPL 2023: ભારતીય વિસ્ફોટક બેટ્સમેન સૂર્યકુમાર યાદવ હાલમાં ખરાબ ફોર્મમાં છે. તે ક્રિકેટના ત્રણેય ફોર્મેટમાં સતત ફ્લોપ રહ્યો છે. ઓસ્ટ્રેલિયા સામેની ટેસ્ટ અને વનડે શ્રેણીમાં ખરાબ પ્રદર્શન બાદ IPL 2023માં પણ સૂર્યકુમારનું ખરાબ ફોર્મ યથાવત છે. IPLમાં મંગળવારે (11 એપ્રિલ) રાત્રે રમાયેલી દિલ્હી કેપિટલ્સ વિરુદ્ધ મુંબઈ ઈન્ડિયન્સની મેચમાં તે ગોલ્ડન ડક થયો હતો. તે પહેલા જ બોલ પર આઉટ થયો હતો. મુકેશ કુમારે તેને પ્રથમ બોલ પર પેવેલિયનમાં મોકલી દીધો હતો. છેલ્લી સાત ઇનિંગ્સમાં આ ચોથી વખત તેણે પહેલા જ બોલ પર પોતાની વિકેટ ગુમાવી હતી.
સૂર્યાના આ ખરાબ ફોર્મની શરૂઆત આ વર્ષે ફેબ્રુઆરીમાં રમાયેલી નાગપુર ટેસ્ટથી થઈ હતી. તે પોતાની ડેબ્યૂ ટેસ્ટમાં ઓસ્ટ્રેલિયા સામે માત્ર 8 રન જ બનાવી શક્યો હતો. આ પછી તેને આ ટેસ્ટ શ્રેણીમાં ફરીથી તક મળી નથી. તે ઓસ્ટ્રેલિયા સામેની વનડે સીરીઝનો ભાગ હતો પરંતુ અહીં તે ત્રણેય મેચમાં શૂન્ય પર આઉટ થયો હતો. T20 ક્રિકેટનો નંબર-1 બેટ્સમેન આ રીતે પહેલા જ બોલ પર વિકેટ આપતો રહ્યો, તે દરેક માટે આશ્ચર્યજનક વાત હતી.
હવે આઈપીએલમાં પણ સૂર્યાનું બેટ ફ્લોપ થઈ રહ્યું છે. પ્રથમ મેચમાં તે આરસીબી સામે માત્ર 15 રન જ બનાવી શક્યો હતો. બીજી મેચમાં તે ચેન્નઈ સામે એક રન બનાવીને આઉટ થયો હતો. હવે ત્રીજી મેચમાં જ્યારે તે ખાતું ખોલાવ્યા વગર જ પેવેલિયન પરત ફર્યો ત્યારે સોશિયલ મીડિયા પર તેની મજાક ઉડાવવામાં આવી હતી. ક્રિકેટ ચાહકોએ તેના પર ઘણા મીમ્સ બનાવ્યા હતા.