ગઠબંધનના નેતા તરીકે ચૂંટાયા બાદ ઉદ્ધવ ઠાકરેએ સોનિયા ગાંધીનો માન્યો આભાર, BJP પર શું કર્યો પ્રહાર ? જાણો વિગત

મહાવિકાસ અઘાડીના નેતા તરીકે ચૂંટાયા બાદ ઉદ્ધવ ઠાકરેએ કહ્યું, મેં સપનામાં પણ વિચાર્યુ નહોતું કે મહારાષ્ટ્રનો સીએમ બનીશ. આ સરકારમાં અનુભવી લોકો હશે.

મુંબઈઃ સુપ્રીમ કોર્ટના ફેંસલા બાદ મહારાષ્ટ્રનું રાજકીય ગણિત પૂરી રીતે બદલાઈ ગયું છે. સુપ્રીમ કોર્ટના ફ્લોર ટેસ્ટના આદેશ બાદ આજે મહારાષ્ટ્રના મુખ્યમંત્રી દેવેન્દ્ર ફડણવીસ અને નાયબ મુખ્યમંત્રી અજીત પવારે રાજીનામું આપી દીધું હતું. સાંજે ટ્રાઇડન્ટમાં શિવેસના, NCP અને કોંગ્રેસના ધારાસભ્યોની બેઠક મળી હતી. જેમાં મહાવિકાસ અઘાડીના નેતા તરીકે શિવસેનાના ઉદ્ધવ ઠાકરેની સર્વાનુમતે વરણી કરવામાં આવી હતી.


મહાવિકાસ અઘાડીના નેતા તરીકે ચૂંટાયા બાદ ઉદ્ધવ ઠાકરેએ કહ્યું, મેં સપનામાં પણ  વિચાર્યુ નહોતું કે મહારાષ્ટ્રનો સીએમ બનીશ. હું સોનિયા ગાંધીનો પણ આભાર માનું છું. આ સરકારમાં અનુભવી લોકો હશે.


તમે લોકોએ મને તમારો નેતા તરીકે પસંદ કર્યો છે. હવે આપણે એક પરિવારની જેમ કરામ કરીશું. આમ આદમીને તેમની સરકાર છે તેમ લાગવું જોઈએ. સરકાર બન્યા બાદ મોટા ભાઈને મળવા દિલ્હી જવાનો છું. ફડણવીસની પ્રેસ કોન્ફરન્સ બાદ લાગ્યું કે આ સંબંધ હવે ન રહેવો જોઈએ. મારા હિન્દુત્વમાં કોઈ ખોટાપણું નથી. તેઓ કહી રહ્યા છે અમે શિવસેનાના આદર્શોનું ઉલ્લંઘન કર્યું પરંતુ હું જણાવવા ઈચ્છું છું કે તને પાલખીમાં બેસાડવા માટે શિવસેનાની સ્થાપના નહોતી થઈ.


મહારાષ્ટ્રમાં ખેડૂતોની હાલત ખરાબ છે. તેના પર કામ કરીશું. હું તમને જણાવવા માંગુ છું કે હું માત્ર સીએમ નથી તમે બધા પણ સીએમ હશો. વિપરિત વિચારધારાવાળા લોકોએ મારા પર ભરોસો કર્યો પરંતુ જે સમાન વિચારધારાવાળા લોકો સાથે હું ત્રીસ વર્ષથી હતો તેમણે ન કર્યો. આજે જે કંઈ થયું તે વાસ્તવિક લોકતંત્ર છે. આપણે બધા મળીને રાજ્યમાં ખેડૂતોના આંસુ લુછીશું.