Rajya Sabha Elections: નવાબ મલિક અને અનિલ દેશમુખને ઝટકો, રાજ્યસભા ચૂંટણીમાં મત નહી આપી શકે

રાજ્યસભાની 16 બેઠકો માટે આજે એટલે કે શુક્રવારે મતદાન થઈ રહ્યું છે.

Rajya Sabha Elections 2022: રાજ્યસભાની 16 બેઠકો માટે આજે એટલે કે શુક્રવારે મતદાન થઈ રહ્યું છે. મહારાષ્ટ્ર, કર્ણાટક, રાજસ્થાન અને હરિયાણાના ધારાસભ્યો તેમના મતનો ઉપયોગ કરી રહ્યા છે. આ દરમિયાન મહારાષ્ટ્રના મંત્રી નવાબ મલિક અને પૂર્વ મંત્રી અનિલ દેશમુખને બોમ્બે હાઈકોર્ટ તરફથી ઝટકો લાગ્યો છે. કોર્ટે બંને નેતાઓને રાજ્યસભાની ચૂંટણીમાં મતદાન કરવાની તાત્કાલિક પરવાનગી આપવાનો ઇનકાર કર્યો હતો. ઉલ્લેખનીય છે કે મતદાનની પ્રક્રિયા આજે સાંજે 4 વાગ્યા સુધી ચાલુ રહેશે.

નવાબ મલિકે કોર્ટનો સંપર્ક કર્યો હતો

નવાબ મલિક જ્યુડિશિયલ કસ્ટડીમાં છે. તેમણે ચૂંટણીમાં મતદાન કરવાની પરવાનગી માટે કોર્ટમાં અરજી કરી હતી. હાઈકોર્ટે કહ્યું કે અરજી ખોટી છે અને તેમને યોગ્ય બેંચ સમક્ષ સુધારેલી અરજી સાથે સંપર્ક કરવા કહ્યું હતું. મુંબઈની વિશેષ અદાલતે ગુરુવારે જેલમાં બંધ NCP નેતાઓ નવાબ મલિક અને અનિલ દેશમુખની અરજીઓ ફગાવી દીધી હતી. બંને નેતાઓએ મતદાન માટે એક દિવસના જામીન માંગ્યા હતા.

એન્ફોર્સમેન્ટ ડિરેક્ટોરેટ (ED) એ ગુરુવારે કેસની સુનાવણી કરતા વિશેષ ન્યાયાધીશ આરએસ રોકડેને જણાવ્યું હતું કે દેશમુખ મની લોન્ડરિંગ કેસમાં મુખ્ય આરોપી છે અને તે જનપ્રતિનિધિત્વ કાયદા હેઠળ કેદી તરીકે મતદાનનો અધિકાર માંગી શકે નહીં.

જોકે, અનિલ દેશમુખ અને નવાબ મલિકે સ્પેશિયલ કોર્ટના આદેશને બોમ્બે હાઈકોર્ટમાં પડકાર્યો હતો અને મતદાન કરવાની પરવાનગી માંગી હતી. બોમ્બે હાઈકોર્ટે ગુરુવારે તાત્કાલિક સુનાવણી હાથ ધરવાનો ઈનકાર કરી દીધો હતો. NCPના બંને વરિષ્ઠ નેતા દેશમુખ અને મલિક હાલમાં મની લોન્ડરિંગના જુદા જુદા કેસમાં જેલમાં છે.