મહેસાણામાં દીપડો દેખાતા ખેડૂતોમાં ભયનો માહોલ, દીપડાને પકડવા પાંજરા મુકાયા

રાતનાં સમયે દીપડો જોવા મળતા વન વિભાગના અધિકારીઓએ તેને પકડવા માટે કાર્યવાહી હાથ ધરી હતી.

મહેસાણાઃ વન્ય જીવો શિકારની શોધમાં વનમાંથી માનવ વિસ્તારો તરફ આવતા ચિંતા વધી છે. મહેસાણા જીલ્લાનાં લીચમાં દીપડો જોવા મળતા લોકોમાં ડરનો માહોલ ફેલાયો છે. રાતનાં સમયે દીપડો જોવા મળતા વન વિભાગના અધિકારીઓએ તેને પકડવા માટે કાર્યવાહી હાથ ધરી હતી. દીપડાને પકડવા ખેતરોમાં પાંજરૂ મુકવામાં આવ્યા હતા. દીપડાનાં ભયથી ખેડૂતો ખેતરોમાં જવાનું પણ ટાળી રહ્યા છે.

બીજી તરફ નવસારી જિલ્લાના ગ્રામ્ય વિસ્તારોમાં દીપડાનો આતંક જોવા મળ્યો હતો. જિલ્લાના ઓણંચી ગામમાં શેરડીની કાપણી સમયે દીપડાના બચ્ચા જોવા મળ્યા હતા. લોકોએ તરત જ આ ઘટનાની જાણ વન વિભાગને કરી હતી.  હાલમાં વન વિભાગે દીપડાના બચ્ચાનો કબ્જો લીધો છે અને યોગ્ય સારવાર આપી ફરી આ જ સ્થળ પર દીપડાના બચ્ચાને છોડી મુકાશે.

રાજકોટ જિલ્લાના ગોંડલ પંથકમાં બે દિવસથી સિંહે ધામા નાખ્યા છે. સિંહના ધામાથી ગ્રામજનોમાં ફફડાટ ફેલાયો છે. નાના ઉમવાડા ગામમાં 3 સિંહે ગાયનું મારણ કર્યું હતું. તો કોલીથડ ગામમાં વાછરડી પર હુમલો કર્યો હતો. સિંહના આંટાફેરાને લઈ ખેડૂતો ખેતરે જતાં ડરે છે. સામાન્ય રીતે ખેતરમાં એકલાં જતાં ખેડૂતો હવે બે-ચાર ભેગા મળી કોઈ એકના ખેતરે જઈને કામ પતાવે છે. તો ગામના સરપંચે વોટ્સએપ ગ્રુપ બનાવ્યું છે. જેમાં સિંહને સંબંધિત મેસેજ કરવા અનુરોધ કરાયો છે. તો કોલીથડ ગામમાં રાત્રે ખેતરે જવા ખેડૂતો મજબૂર છે કારણ કે ખેતરમાં રાત્રે વીજળી અપાય છે. હાલ તો બંને ગામના ખેડૂતોની માંગ છે કે વનવિભાગ ઝડપથી સિંહને પાંજરે પૂરી જંગલમાં ખસેડી લોકોને ભયમાંથી મુક્તિ અપાવે.