આ 17 વર્ષના ધોનીની જેમ સિક્સર ફટકારીને ભારતને બનાવ્યું વર્લ્ડકપ ચેમ્પિયન, આ ખેલાડી છે ક્યાંનો ?

2011ના વર્લ્ડકપની ફાઈનલમાં કેપ્ટન મહેનેદ્રસિંહ ધોનીએ સિક્સર ફટકારીને સ્ટાઈલમાં ભારતને જીત અપાવી હતી.

મુંબઈઃ ભારતના યુવા ક્રિકેટરોની અંડર 19 ટીમે પાંચમી વખત અંડર-19 વર્લ્ડ કપનો ખિતાબ જીતીને ઈતિહાસ રચ્યો છે. ભારતીય ટીમે  190 રનનો ટાર્ગેટ 47.4 ઓવરમાં 6 વિકેટ ગુમાવીને પાર કરી લીધો હતો. આ ઈનિંગમાં નિશાંત સિંધુ 50 અને દિનેશ બાના 13 રન બનાવીને અણનમ રહ્યા હતા. આ ફાઈનલે ક્રિકેટ ચાહકોને 2011ના ભારતના  વર્લ્ડકપ વિજયની યાદ તાજી કરાવી દીધી હતી.

2011ના વર્લ્ડકપની ફાઈનલમાં કેપ્ટન મહેનેદ્રસિંહ ધોનીએ સિક્સર ફટકારીને સ્ટાઈલમાં ભારતને જીત અપાવી હતી. આ મેચમાં પણ દિનેશ બાનાએ સિક્સર ફટકારીને ટીમને જીત અપાવી હતી. મહેન્દ્ર સિંહ ધોનીએ 2011 વિશ્વકપની ફાઇનલમાં સમાન રીતે સિક્સ ફટકારીને ભારતને શ્રીલંકા સામે જીત અપાવી હતી એનું આ પુનરાવર્તમ દિનેશ બાનાએ કર્યું હતું.

દિનેશ બાના હરિયાણાના હિસારનો છે. 15 ડીસેમ્બર, 2004ના રોજ હરિયાણાના હિસારમાં જન્મેલા દિનેશ બાનાએ ભારતના વર્લ્ડકપ વિજયને યાદગાર બનાવી દીધો હતો. ભારતની જીતનો હીરો ઓલરાઉન્ડર રાજ બાવા રહ્યો હતો. બાવાએ પહેલા 31 રનમાં પાંચ વિકેટ લીધી હતી. આ પછી તેણે 35 રનની ઇનિંગ પણ રમી અને બેટિંગમાં શાનદાર પ્રદર્શન કર્યું હતું. આ ઉપરાંત વાઇસ કેપ્ટન શેખ રાશિદે પણ 50 રનની શાનદાર ઇનિંગ રમી હતી.

ભારતીય ટીમે અગાઉ 2000, 2008, 2012 અને 2018માં પણ અંડર-19 વર્લ્ડ કપમાં ખિતાબ જીત્યો હતો. અંડર-19 ક્રિકેટ વર્લ્ડ કપની ફાઈનલમાં ઇંગ્લેન્ડે ભારત વિરૂદ્ધ ટોસ જીતી પહેલા બેટિંગ કરવાનો નિર્ણય લીધો હતો. જો કે ઇંગ્લેન્ડની ટીમ 189 રનમાં ઓલઆઉટ થઈ ગઈ હતી તેથી ભારતને પાંચમુ ટાઈટલ જીતવા માટે 190 રનની જરૂર હતી.

ભારત તરફથી રાજ બાવાએ 5 અને રવિ કુમારે 4 વિકેટ ઝડપી હતી જ્યારે કૌશલ તાંબેને 1 વિકેટ મળી હતી. ઉલ્લેખનીય છે કે ઈંગ્લેન્ડની ટીમે એક સમયે 91 રનમાં સાત વિકેટ ગુમાવી દીધી હતી પરંતુ ત્યાર પછી રેવ અને જેમ્સ સેલ્સ (34)એ આઠમી વિકેટ માટે 93 રનની ભાગીદારી કરીને ઈંગ્લેન્ડને સન્માનજનક સ્કોર સુધી પહોંચાડ્યું હતું.

 

આ પણ વાંચો........