IND vs NZ: શુભમન ગિલે તોડ્યો બાબર આઝમનો આ મોટો રેકોર્ડ, જાણો
ભારતના યુવા સ્ટાર શુભમન ગિલે વર્લ્ડ કપમાં ન્યૂઝીલેન્ડ સામેની મેચ દરમિયાન વર્લ્ડ રેકોર્ડ બનાવ્યો હતો.
ભારતના યુવા સ્ટાર શુભમન ગિલે વર્લ્ડ કપમાં ન્યૂઝીલેન્ડ સામેની મેચ દરમિયાન વર્લ્ડ રેકોર્ડ બનાવ્યો હતો. ધર્મશાલાના હિમાચલ પ્રદેશ ક્રિકેટ એસોસિએશન સ્ટેડિયમમાં રવિવારે (22 ઓક્ટોબર) બંને ટીમો સામસામે આવી હતી. આ મેચ દરમિયાન ગિલે વનડેમાં પોતાના બે હજાર રન પૂરા કર્યા. તેણે સૌથી ઓછી ઇનિંગ્સમાં આ કારનામુ કર્યું છે. આ મામલે ગિલે દક્ષિણ આફ્રિકાના પૂર્વ બેટ્સમેન હાશિમ અમલા અને પાકિસ્તાનના કેપ્ટન બાબર આઝમ સહિત ઘણા ખેલાડીઓને પાછળ છોડી દીધા છે.
ડેન્ગ્યુના કારણે વર્લ્ડ કપની પ્રથમ બે મેચમાં રમી ન શકનાર ગિલ પાકિસ્તાન સામેની મેચમાં વાપસી કરી હતી. તેને બે હજાર રન પૂરા કરવા માટે 14 રનની જરૂર હતી. ગિલે સાતમી ઓવરના ત્રીજા બોલ પર ટ્રેન્ટ બોલ્ટની બોલિંગમાં ચોગ્ગો ફટકારીને તેના બે હજાર રન પૂરા કર્યા. ગિલે તેની 38મી વનડે ઇનિંગમાં બે હજાર રનનો આંકડો પાર કર્યો. હાશિમ અમલાએ 40 ઇનિંગ્સમાં આ કર્યું હતું.
શુભમન ગિલે 24 વર્ષ અને 44 દિવસની ઉંમરમાં ODI ફોર્મેટમાં તેના બે હજાર રન પૂરા કર્યા. તે બે હજાર રન પૂરા કરનાર ભારતનો પાંચમો સૌથી યુવા ખેલાડી છે. આ મામલે સચિન તેંડુલકર પ્રથમ સ્થાને છે. તેણે 20 વર્ષ 354 દિવસની ઉંમરે આ કર્યું. યુવરાજ સિંહે 22 વર્ષ 51 દિવસ, વિરાટ કોહલી 22 વર્ષ 215 દિવસ અને સુરેશ રૈનાએ 23 વર્ષ 45 દિવસની ઉંમરે આ સિદ્ધિ મેળવી હતી.
વર્લ્ડકપમાં ટીમ ઈન્ડિયાની સતત પાંચમી જીત
વિરાટ કોહલીના 95 રનની મદદથી ભારતે ન્યૂઝીલેન્ડને હરાવીને વર્લ્ડ કપમાં પોતાની જીતનો સિલસિલો યથાવત રાખ્યો છે. સતત પાંચમી જીત હાંસિલ કરીને ભારત પોઈન્ટ ટેબલમાં પ્રથમ સ્થાને પહોંચી ગયું છે. આ સાથે ભારતનું હવે સેમીફાઈનલમાં રમવું નિશ્ચિત છે. ભારતે મોહમ્મદ શમીની 5 વિકેટની મદદથી ન્યૂઝીલેન્ડની ઇનિંગ્સને 50 ઓવરમાં 273 રન પર રોકી દીધી હતી. આ લક્ષ્યને હાંસલ કરવા માટે રોહિત શર્માએ ફરી એકવાર 46 રનની તોફાની ઇનિંગ રમી હતી. ભારતે બે ઓવર બાકી રહેતા 274 રન બનાવીને જીત મેળવી હતી. 5 વિકેટ લેનાર ભારતીય ઝડપી બોલર મોહમ્મદ શમીને પ્લેયર ઓફ ધ મેચનો એવોર્ડ આપવામાં આવ્યો હતો.
ભારતીય ટીમની શરૂઆત શાનદાર રહી હતી. ઓપનર રોહિત શર્મા અને શુભમન ગીલે 11.1 ઓવરમાં 71 રન ઉમેર્યા હતા. રોહિત શર્મા 40 બોલમાં 46 રન બનાવીને પેવેલિયન પરત ફર્યો હતો. રોહિત શર્માએ પોતાની ઇનિંગમાં 4 ફોર અને 4 સિક્સર ફટકારી હતી. આ સાથે જ ભારતને 76 રનના સ્કોર પર બીજો ઝટકો લાગ્યો હતો. શુભમન ગિલ 31 બોલમાં 26 રન બનાવીને આઉટ થયો હતો. વિરાટ કોહલી 104 બોલમાં 95 રન બનાવીને પેવેલિયન પરત ફર્યો હતો, પરંતુ ત્યાં સુધીમાં તેણે ટીમ ઈન્ડિયાની જીત સુનિશ્ચિત કરી લીધી હતી.
ટ્રેન્ડિંગ સમાચાર
ટોપ સ્ટોરી
