IPL 2024: IPLમાં કેપ્ટન તરીકે વાપસી કરશે ઋષભ પંત, દિલ્હી કેપિટલ્સે કરી જાહેરાત

IPL 2024: તે IPL 2024 સીઝન દરમિયાન દિલ્હી કેપિટલ્સ ટીમની કેપ્ટનશીપ કરતો જોવા મળશે

ફોટોઃ ટ્વિટર

IPL 2024: ભારતીય વિકેટકીપર બેટ્સમેન ઋષભ પંત ટૂંક સમયમાં ક્રિકેટની પીચ પર વાપસી કરશે. તે IPL 2024 સીઝન દરમિયાન દિલ્હી કેપિટલ્સ ટીમની કેપ્ટનશીપ કરતો જોવા મળશે. ફ્રેન્ચાઇઝીએ મંગળવારે રાત્રે આ અંગેની જાહેરાત કરી હતી. પંત ગયા વર્ષે કાર અકસ્માતમાં ગંભીર રીતે ઘાયલ થયો હતો, જેના કારણે તે છેલ્લી IPL સીઝનમાં રમી શક્યો ન હતો. તેના સ્થાને ડેવિડ વોર્નરે IPL 2023માં દિલ્હીની કેપ્ટનશીપ સોંપાઇ હતી. હવે પંત 15 મહિના બાદ મેદાનમાં પરત ફરવા માટે તૈયાર છે અને તેને ફરી એકવાર ટીમની કેપ્ટનશીપ સોંપવામાં આવી છે.

Grit. Determination. Believe. Rishabh Pant 🫶

🔙 to 🏏 and 🔙 as our ℂ𝔸ℙ𝕋𝔸𝕀ℕ 💙#YehHaiNayiDilli #IPL2024 #RishabhPant pic.twitter.com/wZydHBPudP

— Delhi Capitals (@DelhiCapitals) March 19, 2024

દિલ્હી કેપિટલ્સના સહ-માલિક પાર્થ જિંદાલે એક મીડિયા રિલીઝમાં જણાવ્યું હતું કે, “અમને અમારા કેપ્ટન તરીકે પંતનું ફરી એકવાર સ્વાગત કરવામાં આનંદ થાય છે. ધૈર્ય અને નિર્ભયતાએ હંમેશા તેની ક્રિકેટની બ્રાન્ડને વ્યાખ્યાયિત કરી છે. રિકવરી વખતે પણ તેણે આ વાતની સાબિતિ આપી હતી. હું તેને મારી ટીમ માટે રમતા જોવા માટે રાહ જોઈ શકતો નથી. અમે નવા ઉત્સાહ અને પ્રેરણા સાથે નવી સીઝનમાં પ્રવેશ કરીશું.

તાજેતરમાં ફિટ જાહેર કરવામાં આવ્યો હતો

પંત 30 ડિસેમ્બર 2022ના રોજ દિલ્હીથી પોતાના ઘરે જતી વખતે કાર અકસ્માતનો ભોગ બન્યો હતો. તેની ઈજા એટલી ગંભીર હતી કે તેને સારવાર માટે એરલિફ્ટ કરીને મુંબઈ લઈ જવામાં આવ્યો હતો. સારવાર પછી પંત લાંબા સમય સુધી બેંગ્લોરમાં નેશનલ ક્રિકેટ એકેડમી (NCA) રહ્યો અને સખત મહેનત કર્યા પછી તેણે ફિટનેસ ટેસ્ટ પાસ કરી હતી. તાજેતરમાં બીસીસીઆઈની મેડિકલ ટીમે તેને ફિટ જાહેર કર્યો હતો ત્યારબાદ પંતનું મેદાન પર પરત ફરવું સુનિશ્ચિત થયું હતું.

વિશાખાપટ્ટનમમાં ટીમના ટ્રેનિંગ કેમ્પ સાથે જોડાયો

પંત IPL 2024 માટે દિલ્હી કેપિટલ્સના ટ્રેનિંગ કેમ્પ માટે વિશાખાપટ્ટનમમાં રહ્યો હતો. દિલ્હીની પ્રથમ મેચ 23 માર્ચે પંજાબ કિંગ્સ સામે રમાશે. દિલ્હીના ચાહકો માટે રાહતની વાત છે કે પંત આ ટૂર્નામેન્ટમાં વિકેટકીપર બેટ્સમેન તરીકે રમશે.

પંતની તૈયારીથી પોન્ટિંગ ખુશ છે

દિલ્હી ટીમના મુખ્ય કોચ રિકી પોન્ટિંગ પણ પંતની તૈયારીથી સંતુષ્ટ છે. તેમણે ટીમના ટ્રેનિંગ કેમ્પ દરમિયાન પંતને નેટ્સમાં રમતા જોયા અને તેની બેટિંગ જોઈને ખુશ થયો હતો. પોન્ટિંગે કહ્યું, અમે ગયા વર્ષે પંતને ખૂબ મિસ કર્યો હતો. પંત ટીમમાં ઘણી ઉર્જા લાવે છે અને તેના ચહેરા પર હંમેશા સ્મિત રહે છે.