PM કિસાન યોજના સંબંધિત મેસેજ આવે તો થઇ જાવ સાવધાન, ક્લિક કરતા જ બેન્ક એકાઉન્ટ થઇ જશે ખાલી

હવે આગામી દિવસોમાં આ યોજનાનો 19મો હપ્તો જાહેર થઈ શકે છે.

પ્રતિકાત્મક તસવીર

Source : ABPLIVE AI

PM Kisan Yojana Fraud: પીએમ કિસાન યોજના હેઠળ કેન્દ્ર સરકાર દ્વારા દર વર્ષે ખેડૂતોને 6 હજાર રૂપિયા આપવામાં આવે છે. આ પૈસા વર્ષમાં ત્રણ હપ્તામાં આપવામાં આવે છે. એટલે કે, બે હજાર રૂપિયાનો એક હપ્તો જાહેર કરવામાં આવે છે, હવે આગામી દિવસોમાં આ યોજનાનો 19મો હપ્તો જાહેર થઈ શકે છે. આવી સ્થિતિમાં, દેશભરના ખેડૂતો તેની આતુરતાથી રાહ જોઈ રહ્યા છે. કેટલાક સાયબર છેતરપિંડી કરનારાઓ આનો ફાયદો ઉઠાવી રહ્યા છે અને લોકો સાથે છેતરપિંડી કરી રહ્યા છે. હૈદરાબાદના એક વ્યક્તિ સાથે પણ આવું જ બન્યું, જેના કારણે તેના ખાતામાંથી 1.9 લાખ રૂપિયા ઉપાડી લીધા હતા.

હૈદરાબાદમાં આ રીતે થઈ છેતરપિંડી

છેતરપિંડી કરનારાઓ સતત તેમની નવી પદ્ધતિઓ દ્વારા લોકોને પોતાનો શિકાર બનાવવાનો પ્રયાસ કરી રહ્યા છે. જેમાં સરકારી યોજનાઓના નામે લોકોને છેતરવા અને તેમના પૈસા ચોરી કરવાનો સમાવેશ થાય છે. હૈદરાબાદથી પણ આવો જ એક કિસ્સો પ્રકાશમાં આવ્યો છે, જ્યાં એક 53 વર્ષીય વ્યક્તિએ પીએમ કિસાન યોજનાનો દાવો કરતા મેસેજ પર ક્લિક કર્યું અને 1.9 લાખ રૂપિયા ગુમાવી દીધા હતા.  મેસેજ જોવામાં સત્ય લાગી રહ્યો હતો પરંતુ આ એક ફ્રોડ મેસેજ હતો. આ મેસેજ વોટ્સએપ દ્વારા મોકલવામાં આવ્યો હતો.

પીએમ કિસાન યોજનાનો હપ્તો રિલીઝ થવાનો હોવાથી તમે પણ આવી છેતરપિંડીમાં ફસાઈ શકો છો. આનાથી બચવા માટે આવી કોઈપણ લિંક પર ક્લિક કરશો નહીં. ઉપરાંત, જો તમને કોઈ માહિતીની જરૂર હોય તો તમે કિસાન યોજનાની સત્તાવાર વેબસાઇટની મુલાકાત લઈ શકો છો.

કેન્દ્ર સરકાર દ્વારા ખેડૂતોને આપવામાં આવેલી પીએમ કિસાન યોજનાનો આગામી હપ્તો થોડા દિવસોમાં જાહેર થઈ શકે છે. એવું કહેવામાં આવી રહ્યું છે કે દિલ્હી ચૂંટણી પહેલા આ હપ્તો ખેડૂતોના ખાતામાં પહોંચી શકે છે. જોકે, આ વખતે ઘણા ખેડૂતોને આ યાદીમાંથી બાકાત રાખવામાં આવ્યા છે કારણ કે તેઓ ખોટી રીતે યોજનાનો લાભ લઈ રહ્યા હતા. વિવિધ રાજ્યોમાં આવા ખેડૂતો પાસેથી વસૂલાત પણ કરવામાં આવી રહી છે. તેમજ તેમની સામે કડક કાર્યવાહી કરવામાં આવી રહી છે.