નરેન્દ્ર પટેલે એક કરોડની ઓફરને લઈને શું કર્યો મોટો ધડાકો? ડીલ વખતે કયા ત્રણ બિલ્ડરો હતા હાજર?

નરેન્દ્ર પટેલ પણ રેશમા પટેલ અને વરૂણ પટેલ સાથે ભાજપમાં જોડાયો હતો પણ રવિવારે મોડી રાત્રે નરેન્દ્ર પટેલે ભાજપ પર પ્રહારો કરીને ફરીથી પાસમાં જોડાવાની જાહેરાત કરી છે. નરેન્દ્ર પટેલે આક્ષેપ કર્યો કે, ભાજપ પાટીદારોને ખરીદવાનો પ્રયત્ન કરી રહી છે. તેણે પાટીદાર સમાજ કહેશે તો જ ચૂંટણી લડીશ તેમ કહ્યું હતું.

નરેન્દ્ર પટેલે કહ્યું કે, બળજબરીપૂર્વક મને ભાજપમાં જોડવામાં આવ્યો હતો. તેણે જણાવ્યુ કે, 23 તારીખે 5 હજાર પાટીદારો એકઠા થઇને ભાજપે આપેલા 10 લાખ રૂપિયા મહેસાણા પ્રદેશના શહિદોને અર્પણ કરવામાં આવશે. તેણે વકીલની સહાય લઇને વરૂણ પટેલ પર કાયદાકીય કાર્યવાહી કરવાની પણ જાહેરાત કરી છે.

નરેન્દ્ર પટેલે આક્ષેપ કર્યો કે, વરૂણ પટેલ મને જીતુ વાધાણીના ઘરે લઇ ગયો હતો અને કમલમ ખાતે મને લઇ જઇ 1 કરોડ રૂપિયા આપવાની ઓફર કરવામાં આવી હતી. જેના ભાગ રૂપે મને 10 લાખ રૂપિયા રોકડા આપ્યા હતા. બાકીના 90 લાખ પછી આપવાની વાત કરવામાં આવી હતી.

નરેન્દ્ર પટેલે જણાવ્યું હતું કે, છેલ્લા બે દિવસના તમામ પુરાવા તેમની પાસે છે. તેમણે એવો પણ દાવો કર્યો હતો કે, કમલમ અને જીતુ વાઘાણીના ઘરે થયેલી મુલાકાતના પણ ફોટા તેમની પાસે છે. તેમણે એમ પણ કહ્યું હતું કે, હું વકીલ સાથે વાતચીત કરીને પછી મીડિયામાં જાહેર કરીશ.

વરુણ પટેલે જણાવ્યું હતું કે, વરુણ પટેલ સાથે ડીલ થઈ ત્યારે બેથી ત્રણ બિલ્ડરો પણ હાજર હતા. હું એમને ચેહરાથી ઓળખું છું. પણ તેમના નામ આવડતાં નથી. જોકે, નરેન્દ્ર પટેલે તેમના ફોટા પોતાની પાસે હોવાનું જણાવ્યું હતું.

નરેન્દ્ર પટેલે એબીપી અસ્મિતા સાથેની વાતચીતમાં મોટો ધડાકો કરતાં જણાવ્યું હતું કે, વરુણ પટેલે મને વિશ્વાસમાં લીધો હતો અને ભાજપ પાસે ઉત્તર ગુજરાતના કન્વીનરોને તોડવા માટેની સોપારી લીધી હતી. જેના ભાગરૂપે મુખ્ય કન્વીનર તરીકે મને જવાબદારી આપી હતી. આ તમામ વાતચીતનું રેકોર્ડિંગ પણ મારી પાસે છે.

અમદાવાદઃ પાટીદાર અનામત આંદોલન સમિતિ (પાસ)ના કન્વીનર નરેન્દ્ર પટેલે ભાજપમાં જોડાયાના ગણતરીના કલાકોમાં જ મોટો ધડાકો કર્યો હતો કે, વરૂણ પટેલે મારી સાથે ભાજપમાં જોડાવા માટે એક કરોડ રૂપિયાનો સોદો કર્યો હતો. આ પૈકી વરૂણ પટેલે મને ટોકન પેટે 10 લાખ રૂપિયા આપ્યા છે. આ સમયે ત્રણ બિલ્ડરો પણ હાજર હોવાનો દાવો નરેન્દ્ર પટેલે કર્યો છે.