ડ્રાઇવિંગ લાયસન્સ બનાવવું હવે થશે સરળ, સરનામુ બદલાવવા નહિ આપવી પડે ફી
ડ્રાઇવિંગ લાઇસન્સના નિયમોમાં ફેરફાર કરવા માટેનો ડ્રાફ્ટ જાહેર કરવામાં આવ્યો છે. સરનામું, મોબાઇલ નંબર અને ઈમેલ અપડેટ કરવાની ફી નાબૂદ કરવા, અરજીઓના નિકાલ માટે સમયમર્યાદા નક્કી કરવા અને કેટલાક કિસ્સાઓમાં આપમેળે મંજૂરી આપવાના પ્રસ્તાવો સામેલ છે.
ડ્રાઇવિંગ લાઇસન્સમાં સરનામું બદલાવવું હોય કે, મોબાઇલ નંબર અને ઈમેલ અપડેટ કરાવવાં હોય, તો આવનારા દિવસોમાં આ કામો માટે ફી ચૂકવવી ન પડે તેવી શક્યતા છે. અરજીઓ પર નિર્ણય લેવા માટેની સમયમર્યાદા પણ નક્કી થઈ શકે છે. કેન્દ્ર સરકારે ડ્રાઇવિંગ લાઇસન્સ સંબંધિત નિયમોમાં ફેરફારનો ડ્રાફ્ટ જાહેર કર્યો છે. તેમાં ઑનલાઇન અરજીની પ્રક્રિયા સરળ બનાવવા ઉપરાંત, કેટલાક કિસ્સાઓમાં નિર્ધારિત સમયમર્યાદામાં નિર્ણય ન લેવાય તો આપમેળે મંજૂરી મળી જવાની જોગવાઈનો પણ પ્રસ્તાવ છે.
સરનામું બદલવા માટે વીજળી અને ગેસનું બિલ પણ માન્ય રહેશે
પ્રસ્તાવ મુજબ, ડ્રાઇવિંગ લાઇસન્સમાં સરનામું, મોબાઇલ નંબર અને ઈમેલ અપડેટ કરાવવા માટેની ફી નાબૂદ થઈ શકે છે. આધાર દ્વારા ઑનલાઇન ઓળખની ચકાસણી સાથે જોડાયેલી સેવાઓ પણ મફત કરવાની દરખાસ્ત છે. સરનામાના પુરાવા તરીકે ત્રણ મહિનાથી વધુ જૂનું ન હોય તેવું વીજળીનું બિલ અને ઘરેલુ ગેસનું બિલ પણ સ્વીકારવામાં આવી શકે છે.
અરજી પર કેટલા દિવસમાં નિર્ણય લેવાશે?
ડ્રાફ્ટમાં વિવિધ સેવાઓ માટે સમયમર્યાદા નક્કી કરવાનો પ્રસ્તાવ છે.
નામ અને અન્ય વિગતોમાં ફેરફાર: અરજી પર 15 દિવસમાં નિર્ણય લેવો પડશે.
સરનામામાં ફેરફાર: અરજી પર 30 દિવસની અંદર નિર્ણય ન લેવાય તો તેને મંજૂર ગણવાનો પ્રસ્તાવ છે.
લાઇસન્સમાંથી વાહનની શ્રેણી દૂર કરવી: આ માટેની અરજી પર સાત દિવસમાં આપમેળે કાર્યવાહી કરવાની જોગવાઈનો પ્રસ્તાવ છે.
વારંવાર વિગતો ભરવાની ઝંઝટ ઘટશે
સારથી (Sarathi) પોર્ટલ પર અરજી કરતી વખતે અગાઉથી ઉપલબ્ધ વિગતો આપમેળે ભરાઈ જાય તેવી વ્યવસ્થા શરૂ કરવાનો પ્રસ્તાવ છે.
આ ઉપરાંત, નીચેની સેવાઓ માટે અલગ-અલગ ફોર્મ લાવવાની તૈયારી છે:
ડ્રાઇવિંગ લાઇસન્સનું નવીનીકરણ (રિન્યુઅલ).
ડુપ્લિકેટ ડ્રાઇવિંગ લાઇસન્સ મેળવવું.
લાઇસન્સમાં નવી વાહન શ્રેણી ઉમેરાવવી.
આ ફેરફારોથી ઑનલાઇન અરજી કરવાની પ્રક્રિયા વધુ સરળ બની શકે છે.
ઇમરજન્સી કૉન્ટેક્ટ અને અંગદાનનો વિકલ્પ પણ મળશે
ડ્રાઇવિંગ લાઇસન્સની અરજીમાં ઇમરજન્સી કૉન્ટેક્ટની વિગતો ફરજિયાત કરવાની અને અંગદાન માટે સંમતિ આપવાનો વિકલ્પ સામેલ કરવાની પણ દરખાસ્ત છે.
હાલમાં આ બધા ફેરફારો માત્ર પ્રસ્તાવિત છે
નોંધનીય છે કે, આ તમામ ફેરફારો હાલમાં માત્ર પ્રસ્તાવના તબક્કામાં છે, અમલમાં આવ્યા નથી. કેન્દ્રીય માર્ગ પરિવહન અને રાજમાર્ગ મંત્રાલયે ડ્રાફ્ટ અંગે લોકો પાસેથી 30 દિવસની અંદર સૂચનો અને વાંધાઓ મંગાવ્યાં છે. લોકો તરફથી મળેલા સૂચનો અને વાંધાઓ પર વિચાર કર્યા પછી જ નિયમોમાં ફેરફાર અંગેની અંતિમ સ્થિતિ સ્પષ્ટ થશે. તેથી, હાલ સરનામું બદલવાની કે અન્ય વિગતો અપડેટ કરવાની ફી નાબૂદ થઈ ગઈ છે એવું માનવું યોગ્ય નથી.
ટોપ સ્ટોરી
ટ્રેન્ડિંગ સમાચાર
