તમારી પેટ્રોલ કારમાં CNG કિટ નંખાવતા પહેલા આ સરકારી નિયમો જાણી લો, નહીં તો પસ્તાશો

CNG Conversion: 3.5 ટનથી ઓછા વજનવાળા વાહનોમાં જ CNG કિટ લાગી શકે; બ્રાન્ડેડ કિટનો ખર્ચ ₹35,000થી ₹80,000 સુધી આવી શકે છે, RC બુકમાં અપડેટ જરૂરી.

Petrol to CNG Car Conversion Cost Rules and Factors to Consider

Source : ai

Show Quick Read

Key points generated by AI, verified by newsroom

• પેટ્રોલના ભાવ વધારાને પગલે કારમાં CNG કિટ લગાવવાનો વિકલ્પ.
• ₹35,000 થી ₹80,000 સુધી CNG કિટ લગાવવાનો ખર્ચ.
• RC બુક અને વીમા કંપનીમાં ફેરફાર કરાવવો ફરજિયાત.
• CNG ના ફાયદા-ગેરફાયદા, વોરંટી રદ થવાનું જોખમ.

Petrol to CNG conversion cost 2026: પેટ્રોલના સતત વધતા ભાવે વાહનચાલકોના બજેટ ખોરવી નાખ્યા છે, જેના કારણે ઘણા લોકો હવે પોતાની પેટ્રોલ કારમાં CNG કિટ લગાવવાનું વિચારી રહ્યા છે. આનું મુખ્ય કારણ એ છે કે પેટ્રોલની સરખામણીમાં CNG સસ્તું પડે છે અને માઇલેજ પણ સારી આપે છે. જોકે, પેટ્રોલ કારને CNG માં કન્વર્ટ કરાવતા પહેલા તેના નિયમો, ખર્ચ અને કેટલીક અગત્યની બાબતો વિશે જાણવું ખૂબ જ જરૂરી છે, જેથી ભવિષ્યમાં કોઈ મુશ્કેલી ન પડે.

સૌથી પહેલા તો એ જાણવું જરૂરી છે કે દરેક કારમાં CNG કિટ નથી લગાવી શકાતી. સરકારી નિયમો મુજબ, જે વાહનનું વજન 3.5 ટનથી ઓછું હોય તેમાં જ CNG કિટ ફીટ કરી શકાય છે. સામાન્ય રીતે હેચબેક, સેડાન અને કેટલીક નાની SUV માં આ કિટ સરળતાથી લાગી જાય છે. પરંતુ, જો તમારી કાર ખૂબ જૂની હોય કે પછી એન્જિનમાં કોઈ ખામી હોય, તો તેમાં CNG કિટ લગાવવી હિતાવહ નથી. માટે કિટ લગાવતા પહેલા મિકેનિક પાસે કારની કન્ડિશન અને એન્જિન ચેક કરાવી લેવું જોઈએ.

CNG કિટ લગાવવાનો ખર્ચ કેટલો?

જો ખર્ચની વાત કરીએ તો, પેટ્રોલ કારમાં CNG કિટ ઇન્સ્ટોલ કરાવવાનો ખર્ચ સામાન્ય રીતે ₹35,000 થી લઈને ₹80,000 સુધીનો આવી શકે છે. આ ખર્ચ તમારી કારનું મોડેલ, એન્જિનની ક્ષમતા અને તમે કઈ બ્રાન્ડની કિટ લગાવો છો તેના પર આધાર રાખે છે. સારી અને બ્રાન્ડેડ કિટ થોડી મોંઘી જરૂર પડે છે, પણ લાંબા ગાળે તે સેફ અને ભરોસાપાત્ર હોય છે. કેટલાક લોકો થોડા રૂપિયા બચાવવા માટે સસ્તી કિટ લગાવી દે છે, જેનાથી પાછળ જતાં એન્જિનમાં ખામી આવી શકે છે અને સલામતી જોખમાય છે.

કિટ હંમેશા સરકાર દ્વારા માન્યતા પ્રાપ્ત અને ઓથોરાઈઝ્ડ ડીલર પાસેથી જ લગાવવી. કિટ લગાવ્યા બાદ તેનું અસલ બિલ અને સર્ટિફિકેટ લેવાનું ચૂકશો નહીં. આ ઉપરાંત, ઈંધણનો પ્રકાર બદલાયો હોવાથી તમારી કારની RC (રજિસ્ટ્રેશન સર્ટિફિકેટ) બુકમાં પણ સુધારો કરાવવો ફરજિયાત છે. આની જાણ તમારી વીમા કંપનીને પણ કરવી પડે છે, જો આમ ન કરો તો અકસ્માત સમયે વીમો પાસ થવામાં મુશ્કેલી પડી શકે છે.

CNG કારના ફાયદા અને ગેરફાયદા

ફાયદાની વાત કરીએ તો, CNG નો રનિંગ ખર્ચ પેટ્રોલ કરતાં ઘણો ઓછો આવે છે. અંદાજે એક કિલોમીટર ચલાવવાનો ખર્ચ ₹2 થી ₹3 જ આવે છે. વળી, CNG થી પ્રદૂષણ પણ ઓછું થાય છે.

પરંતુ તેની સામે કેટલાક ગેરફાયદા પણ છે. ડિકીમાં સિલિન્ડર આવી જવાથી બૂટ સ્પેસ ખતમ થઈ જાય છે. અમુક કારમાં પિકઅપ અને પરફોર્મન્સ થોડું ઘટી જાય છે. જો કિટ બરાબર ન લાગી હોય તો એન્જિન અને ECU માં પ્રોબ્લેમ આવી શકે છે. સૌથી મોટી વાત એ છે કે, જો કાર નવી હોય અને તમે બહારથી કિટ લગાવો તો કંપની કારની વોરંટી રદ કરી દે છે. આથી જ મોટાભાગના લોકો હવે નવી કાર લેતી વખતે ફેક્ટરી-ફિટેડ CNG મોડેલ લેવાનું વધુ પસંદ કરે છે.