સરકારના આ નિર્ણયથી મોંઘી થઈ જશે નાની કાર, જાણો કેટલા રૂપિયા વધારે ચૂકવવા પડશે...

નવી દિલ્હીઃ વસ્તુ અને સેવા કર (GST) એક જુલાઈથી લાગુ થયા બાદ નાની અને મધ્યમ કારની કિંમતમાં થોડો વધારો થઈ શકે છે. જીએસટીમાં ઓછામાં ઓછો 10 કેન્દ્રીય અને રાજ્યના કર બંધ થઈ જશે અને તેની જગ્યાએ એક જ કર લાગશે. જીએસટી વ્યવસ્થા અંતર્ગત જુદી જુદી વસ્તુઓ અને સેવાઓને પાંચ, 12, 18 અને 28 ટકાના ચાર દરમાંથી કોઈપણ એક રેટમાં રાખવામાં આવશે.

નાની કાર પર હાલમાં 12.5 ટકા સેન્ટ્રલ એક્સાઈઝ ડ્યુટી ઉપરાંત રાજ્યો દ્વારા 14.5-15 ટકા વેટ લાગુ થતો હોઈ કુલ 27-27.5 ટકા જેટલો કર લાગે છે. નાણાં મંત્રાલયના એક વરિષ્ઠ અધિકારીના જણાવ્યાં અનુસાર આ કેટેગરીની કાર માટેનો ટેક્સ સ્લેબ 28 ટકા જેટલો રહેશે, જેથી તેની કિંમતમાં આંશિક વધારો થશે.

મધ્યમ કદની 1500 સીસી સુધીની કાર પર હાલમાં કેન્દ્ર સરકાર દ્વારા 24 ટકા સેન્ટ્રલ એક્સાઈઝ તથા રાજ્ય સરકારો દ્વારા 14.5 ટકા વેટ વસૂલવામાં આવે છે જેને કારણે કરનું કુલ ભારણ 38.5 ટકા જેટલું થાય છે. આથી આ કેટેગરીના વાહનોને 28 ટકાનો સર્વોચ્ચ કર દર લાગુ પડશે તથા રાજ્યોના વળતર માટેના સેસને પગલે કુલ કરનું ભારણ વર્તમાન સ્તર જેટલું થશે તેમ તેમણે જણાવ્યું હતું.

એસયુવી તથા 1500 સીસીથી વધુની કાર પર હાલ 41.5 ટકાથી 44.5 ટકા (27 30 ટકા સેન્ટ્રલ એક્સાઈઝ તથા 14.5 ટકા વેટ) જેટલું કરનું ભારણ છે. અધિકારીએ જણાવ્યું હતું કે આ કેટેગરીની કારને 28 ટકાના સ્લેબ અને 15 ટકાના મહત્તમ સેસ સ્લેબમાં મુકવામાં આવશે. જેને કારણે તેની પરનું કરનું કુલ ભારણ 43 ટકા જેટલું થશે.