પાડોશી પર હુમલો કરવાને મામલે અભિનેતા આદિત્ય પંચોલીને એક વર્ષની જેલ, મળ્યા જામીન

મુંબઈ: પાડોશી પર હુમલો કરવાના મામલાને લઈને બોલીવુડ એક્ટર આદિત્ય પંચોલીને એક વર્ષ જેલની સજા કરવામાં આવી છે. મુંબઈની અંધેરી કોર્ટના મેજિસ્ટ્રેટ અમિતાભ પંચભાઈએ શુક્રવારે આદિત્ય પંચોલીને પડોશી પર હુમલો કરવાને લઈને દોષી માની એક વર્ષની સાધારણ સજા સંભળાવી હતી. તેમજ આ ઘટનાને લઈને આદિત્ય પંચોલીને 20,000 રૂપિયાનો દંડ ભરવાનો પણ આદેશ કર્યો છે. આદિત્ય પંચોલીના વકીલે સજાની સુનવણીની જાહેરાત કરાતા કોર્ટમાં જામીન માટે અપીલ કરી, જેથી જામીન મળતા જલ્દીથી આદિત્ય બહાર આવી શકે. જામીન માટે  આદિત્ય તરફથી 12,000 રૂપિયાની રાશિ પણ જમા કરવામાં આવી છે. આદિત્ય પંચોલીની વિરૂધ્ધમાં વર્ષ 2005માં આ મામલે ફરિયાદ નોંધાઈ હતી. ફરિયાદીએ આરોપ લગાવ્યા હતા કે આદિત્ય પંચોલી દ્વારા કરવામાં આવેલા હુમલામાં તેના નાકમાંથી લોહી નીકળવા સહિત ઘણી ગંભીર ઈજાઓ થઈ હતી. પરંતુ આદિત્યે આ આરોપોનું ખંડન કરતા કહ્યું હતું કે તમામ આરોપો ખોટા છે. આ જાણી જોઈને કરવામાં આવેલા આરોપો છે જેના કારણે ફરિયાદ એક દિવસ બાદ દાખલ કરાઈ હતી.