Raja Shivaji Trailer: 'રાજા શિવાજી'નું ટ્રેલર લોન્ચ, રિતેશ દેશમુખનું પાવર પરફોર્મન્સ, સંજય દત્તનો ખૂંખાર અંદાજ
મરાઠા યોદ્ધા અને હિન્દુ સ્વરાજ્યના સ્થાપક છત્રપતિ શિવાજી મહારાજના જીવન પર આધારિત આ ફિલ્મ રિતેશ દેશમુખ દ્વારા લખાયેલી અને દિગ્દર્શિત છે.
છત્રપતિ શિવાજી મહારાજ પર વધુ એક મોટી ફિલ્મ આવી રહી છે. તેનું નામ છે 'રાજા શિવાજી'. વીર મરાઠા યોદ્ધા અને હિન્દુ સ્વરાજ્યના સ્થાપક છત્રપતિ શિવાજી મહારાજના જીવન પર આધારિત આ ફિલ્મ રિતેશ દેશમુખ દ્વારા લખાયેલી અને દિગ્દર્શિત છે. ફિલ્મનું ધમાકેદાર ટ્રેલર રિલીઝ થયું છે. બોલિવૂડ સ્ટાર્સથી ભરેલી આ ફિલ્મ 1 મેના રોજ હિન્દી, મરાઠી અને તેલુગુ ભાષામાં સિનેમાઘરોમાં રિલીઝ થશે.
રાજા શિવાજી ટ્રેલર રિલીઝ થયું
2 મિનિટ, 59 સેકન્ડના ટ્રેલરમાં સ્વરાજ્યની માંગ અને મરાઠાઓના વિદ્રોહની સ્ટોરી દર્શાવવામાં આવી છે. રિતેશ દેશમુખ છત્રપતિ શિવાજી મહારાજ તરીકે શાનદાર દેખાય છે. તેમની રિયલ લાઈફ પત્ની જેનેલિયા ડિસોઝા સાઈબાઈનું પાત્ર નિભાવ્યું છે. વિદ્યા બાલન નકારાત્મક ભૂમિકામાં છે. ખુંખાર અફઝલ ખાન (સંજય દત્ત) નો મરાઠાઓ પર જુલમ અને અંતમાં શિવાજી તેને મોતને ઘાટ ઉતારે છે. બેકગ્રાઉન્ડ સ્કોર ફિલ્મના ઈમોશન અને કોર સાથે સંપૂર્ણ રીતે મેળ ખાય છે. મોટા પાયે અને વિશાળ બજેટ સાથે બનેલી આ ફિલ્મ ફક્ત મરાઠાઓ માટે એક ફિલ્મ નથી, પરંતુ એક ભાવના છે.
રિતેશ પહેલા ઘણા કલાકારોએ પડદા પર શિવાજી મહારાજની ભૂમિકા ભજવી છે. રિતેશ આ ભૂમિકામાં પોતાને અલગ પાડવામાં સફળ રહ્યો હોય તેવું લાગે છે. શિવાજી મહારાજની ભૂમિકામાં તેણે જે રીતે આક્રમકતા અને લાગણીઓને સંતુલિત કરી તે પ્રશંસનીય છે. ટ્રેલર લોન્ચ ઇવેન્ટ દરમિયાન, તે અને જેનેલિયા ફિલ્મ વિશે વાત કરતી વખતે ભાવુક થઈ ગયા. તેમના માટે આ ફિલ્મ તેમનો ડ્રીમ પ્રોજેક્ટ છે અને તેમને તેના માટે ઘણી આશાઓ છે. ટ્રેલર જોયા પછી લોકોએ તેની પ્રશંસા કરી છે. યુઝર્સ કહે છે કે આ ફિલ્મ 'છાવા' અને 'ધુરંધર' જેવી બ્લોકબસ્ટર સાબિત થશે. કોઈએ કહ્યું, 'આ ફિલ્મ રિતેશની છબીને હંમેશા માટે બદલી નાખશે.' યુઝર્સે રિતેશના અભિનયની પ્રશંસા કરી છે. બીજાએ લખ્યું, 'નેક્સ્ટ છાવા લોડિંગ.'
ઐતિહાસિક ડ્રામામાં જેનેલિયા દેશમુખ, અભિષેક બચ્ચન, વિદ્યા બાલન, સંજય દત્ત, મહેશ માંજરેકર, ફરદીન ખાન અને ભાગ્યશ્રી મુખ્ય રોલમાં જોવા મળશે. ધુરંધરની બ્લોકબસ્ટર સફળતા બાદ સંજય દત્ત ફરી એકવાર શક્તિશાળી ભૂમિકામાં જોવા મળે છે. અભિષેક છત્રપતિ શિવાજીના મોટા ભાઈ સંભાજી શાહજી ભોસલેની ભૂમિકામાં જોવા મળશે.
ટોપ સ્ટોરી
ટ્રેન્ડિંગ સમાચાર
