બ્રેકિંગ ન્યૂઝ: લિજેન્ડરી ગાયિકા આશા ભોંસલેને હાર્ટ એટેક, મુંબઈની બ્રીચ કેન્ડી હોસ્પિટલમાં કરાયા દાખલ

ગિનીસ વર્લ્ડ રેકોર્ડ ધારક અને બોલિવૂડની દિગ્ગજ ગાયિકા આશા ભોંસલેને શનિવારે હૃદયરોગનો હુમલો આવતા ચાહકોમાં ચિંતાનું મોજું ફરી વળ્યું છે.

singer asha bhosle suffers heart attack admitted to breach candy hospital

Show Quick Read

Key points generated by AI, verified by newsroom

• આશા ભોંસલેને હૃદયરોગનો હુમલો, મુંબઈ હોસ્પિટલમાં દાખલ.
• 20 થી વધુ ભાષાઓમાં 12,000 થી વધુ ગીતો ગાયા.
• 1948 માં શરૂઆત, આર.ડી. બર્મન સાથે રચ્યો ઈતિહાસ.
• દેશ તેમના વહેલા સ્વસ્થ થવા માટે પ્રાર્થના કરી રહ્યો છે.

Asha Bhosle Heart Attack: બોલિવૂડ જગત અને સંગીત પ્રેમીઓ માટે એક ખૂબ જ ચિંતાજનક સમાચાર સામે આવ્યા છે. ભારતીય સંગીતની શાન ગણાતા લિજેન્ડરી ગાયિકા આશા ભોંસલેને શનિવારે હૃદયરોગનો હુમલો (હાર્ટ એટેક) આવ્યો છે. તબિયત અચાનક બગડતા તેમને તાત્કાલિક મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા છે. હાલમાં ત્યાં તેમની સઘન સારવાર ચાલી રહી છે. જોકે, હોસ્પિટલ પ્રશાસન કે પરિવાર તરફથી હજુ સુધી તેમના સ્વાસ્થ્ય અંગે કોઈ સત્તાવાર અપડેટ કે પુષ્ટિ કરવામાં આવી નથી. આ સમાચાર મળતા જ હોસ્પિટલ બહાર મીડિયા અને પાપારાઝીની ભીડ જમા થઈ ગઈ છે અને તેમના અસંખ્ય ચાહકોમાં ભારે નિરાશા અને ચિંતાનો માહોલ જોવા મળી રહ્યો છે.

20 ભાષાઓમાં ગાયા છે 12,000 થી વધુ ગીતો

આશા ભોંસલેનું નામ બોલિવૂડની સૌથી મહાન અને દિગ્ગજ ગાયિકાઓમાં ગણાય છે. 8 સપ્ટેમ્બર 1933 ના રોજ જન્મેલા આશાજીએ પોતાની શાનદાર કારકિર્દીમાં 20 થી વધુ ભાષાઓમાં 12,000 થી વધુ ગીતો ગાયા છે. સંગીતના ઈતિહાસમાં સૌથી વધુ ગીતો રેકોર્ડ કરવાનો 'ગિનીસ વર્લ્ડ રેકોર્ડ' પણ તેમના જ નામે છે. ભારતનાં બુલબુલ અને ફિલ્મ જગતની સુપરસ્ટાર ગણાતા સ્વરકોકિલા લતા મંગેશકર તેમના મોટા બહેન છે. આશાજીએ પોતાના સુમધુર અવાજ અને અનોખી અદાથી દાયકાઓ સુધી ફિલ્મ ઈન્ડસ્ટ્રી પર એકચક્રી રાજ કર્યું છે અને આજે 70 થી વધુ વર્ષોથી તેઓ ઇન્ડસ્ટ્રીમાં સક્રિય છે.

1948 માં કરી હતી શરૂઆત, આર.ડી. બર્મન સાથે રચ્યો ઈતિહાસ

આશાજીની મ્યુઝિકલ જર્નીની શરૂઆત વર્ષ 1948 માં આવેલી ફિલ્મ "ચુનરિયા" ના ગીત "સાવન આયા હૈ" થી થઈ હતી. ધીમે ધીમે તેમણે પોતાની ગાયકીથી 2200 થી વધુ ફિલ્મોમાં જાદુ પાથર્યો અને એક અંદાજ મુજબ તેમની આખી કારકિર્દીમાં તેમણે લગભગ 16,000 જેટલા ગીતો રેકોર્ડ કર્યા છે. તેમણે માત્ર હિન્દી જ નહીં, પરંતુ ગુજરાતી, મરાઠી, બંગાળી, પંજાબી, ભોજપુરી, તમિલ, મલયાલમ, અંગ્રેજી અને રશિયન જેવી અનેક ભાષાઓમાં પોતાનો અવાજ આપ્યો છે.

તેમના અંગત જીવનની વાત કરીએ તો, તેમના લગ્ન બોલિવૂડના દિગ્ગજ અને સુપરસ્ટાર સંગીત નિર્દેશક આર.ડી. બર્મન (R.D. Burman) સાથે થયા હતા. આ જોડીએ હિન્દી સિનેમાને અનેક સદાબહાર અને સુપરહિટ ગીતો આપ્યા છે. સંગીત ક્ષેત્રે તેમના આ જંગી યોગદાનને જોતા વર્ષ 2008 માં ભારત સરકાર દ્વારા તેમને 'પદ્મ વિભૂષણ' થી પણ સન્માનિત કરવામાં આવ્યા હતા. આ ઉપરાંત તેમણે બીજા ડઝનબંધ પુરસ્કારો પોતાના નામે કર્યા છે. હાલ આખો દેશ તેઓ વહેલી તકે સ્વસ્થ થઈને ઘરે પરત ફરે તેવી પ્રાર્થના કરી રહ્યો છે.