રાજ્યમાં હિટવેવ, અમદાવાદમાં હજુ 24 કલાક ગરમીનું જોર રહેશે, 45 ડિગ્રીની શક્યતા

હવામાન વિભાગનાં આંકડાઓ મુજબ, ગરમ પવનોની અસરોથી અમદાવાદનું મહત્તમ તાપમાન સામાન્ય કરતાં 1.2 ડિગ્રી વધીને 41.0 ડિગ્રી અને લઘુતમ તાપમાન સામાન્ય કરતાં 1.1 ડિગ્રી વધીને 25.1 ડિગ્રી નોંધાયું હતું. જેને કારણે શહેરમાં વહેલી સવારથી અકળાવી મૂકતા બફારાની સાથે દિવસ દરમિયાન માથું ફાડી નાંખે તેવી ગરમીથી લોકો ત્રાહિમામ્ પોકારી ગયા હતા.

અમદાવાદઃ છેલ્લા બે દિવસથી ગુજરાતભરમાં હિટવેવ શરૂ થઇ ગયો છે. ઉત્તર-પશ્ચિમથી ઉત્તરના ગરમ પવનોને લઇને સૌરાષ્ટ્ર-કચ્છ અને દક્ષિણ ગુજરાતમાં કાળઝાળ ગરમી પડી રહી છે. ઉલ્લેખનીય છે કે, પાકિસ્તાનમાં સર્જાયેલા વેસ્ટર્ન ડિસ્ટર્બન્સની સાથે સાઈક્લોનિક સરક્યુલેશન સર્જાયું જેના કારણે પવનની દિશા બદલાઇ અને ઉત્તર-પશ્ચિમથી ઉત્તરના ગરમ પવનોની અસરોથી હિટવેવથી સર્જાયું છે. બુધવારે રાજ્યનાં મોટાભાગનાં શહેરોમાં ગરમીનો પારો 40 ડિગ્રી પાર કરી ગયો હતો.