Alert! 25 વર્ષની સૌથી વધુ ગરમીની આગાહી, ગુજરાતમાં ગરમીની તીવ્રતા વધશે

નવી દિલ્હીઃ આંધ્ર પ્રદેશ અને તેલંગાનાના લોકોને આ વખતે કાળઝાળ ગરમીનો સામનો કરવો પડી શકે છે કે કારણ કે હવામાન વિભાગે એપ્રિલ મહિનામાં આ રાજ્યોમાં ઝડપી ગરમ હવાની આગાહી કરી છે. હવામાન વિભાગે માર્ચથી મે 2017 માટે કરેલી આગાહી મુજબ દેશભરમાં સરેરાશ મહત્તમ તાપમાન ગત વર્ષની સરખામણીએ એક કે તેથી વધુ ડિગ્રી ઊંચુ રહેશે.

વિભાગે ગુજરાત સહિત 17 રાજ્યોને હીટવેવ ઝોનમાં મૂક્યાં છે. કેટલાંક રાજ્યોમાં તો તાપમાન સામાન્ય કરતાં 5 ડિગ્રી ઊંચુ રહેવાની શક્યતા છે. માર્ચથી મે દરમિયાન અત્યંત ગરમ પવન ફૂંકાવાની પણ આગાહી છે. ગુજરાત હીટવેવ ઝોનમાં આવતું હોવાથી ત્રણ મહિના દરમિયાન સૌથી વધુ ગરમી પડી શકે છે.

હવામાન વિભાગનાં જણાવ્યાં અનુસાર, 1901 પછી 2016 સૌથી ગરમ વર્ષ રહ્યું હતું. સામાન્ય કરતાં 1 ડિગ્રી ઊંચુ તાપમાન દેશનાં તમામ હવામાન સબ ડિવિઝનમાં રહેશે. જાન્યુઆરી 2017 દરમિયાન પણ સરેરાશ મીન ટેમ્પરેચર પણ અગાઉના વર્ષની સરખામણીએ 0.67 ટકા ઊંચુ રહ્યું હતું.

હીટવેવ દરમિયાન સામાન્ય તાપમાન ઊંચુ રહેવા ઉપરાંત સિવિયર હીટવેવની આગાહી છે. સામાન્ય તાપમાનમાં 5થી 6 ડિગ્રીના વધારાને સિવિયર હિટવેવ કહેવામાં આવે છે. હવામાનનાં કેટલાંક અભ્યાસોનું તારણ છે કે, દેશમાં ઉનાળાની તીવ્રતા અને સમાયગાળામાં પણ વધારો થશે.

પુના ખાતેના હવામાન વિભાગના સંશોધન કેન્દ્રના નિષ્ણાત કે. સહાયનાં જણાવ્યાં અનુસાર, વર્ષે મીન ટેમ્પરેચર(મહત્તમ અને લઘુતમ તાપમાનનો સરવાળો કરીને બે વડે ભાગવાથી મળતું તાપમાન) છેલ્લાં 25 વર્ષમાં સૌથી ઊંચુ રહી શકે છે.