એપ્રિલ ફૂલ પર કોગ્રેસે ભાજપ-મોદી પર સાધ્યું નિશાન, ટ્વિટર પર જાહેર કર્યો વીડિયો

નવી દિલ્લી: કૉંગ્રેસે ફરી એક વખત ટ્વિટરના માધ્યમથી પ્રધાનમંત્રી નરેંદ્ર મોદી અને ભાજપ સરકાર પર નિશાન સાધ્યું છે. કૉંગ્રેસ પાર્ટીએ 1લી એપ્રિલની તારીખનો સહારો લઈને મોદી સરકાર પર લોકોને એપ્રિલ ફૂલ બનાવવાનો આરોપ લગાવ્યો છે. એટલુ જ નહી ભાજપ પર નિશાન સાધતા કોગ્રેસે તેને ભારતીય જુમલા પાર્ટી ગણાવી હતી અને ટ્વિટર પર #HappyJumlaDivas હેશટેગ સાથે કટાક્ષમાં ટ્વિટ કરી રહ્યું છે.

કાળુ નાણુ પાછુ લાવવાના મોદી સરકારના વાયદાની મજાક ઉડાવતા કહેવામાં આવ્યું છે કે મોદીજીના જૂમલા મુજબ દરેક ભારતવાસીઓના ખાતામાં 15 લાખ રૂપિયા જમા થઈ ગયા છે. દેશનું દરેક રાજ્ય-શહેર સ્માર્ટ થઈ ગયું છે. જ્યાં રોબોટ દરેક ઘરેથી કચરો એકઠો કરી રહ્યા છે. સરકારે 200 કરોડ નવી નોકરીઓ આપી દીધી છે જેનાથી મંગળ ગ્રહના એલિયન પણ આવીને ભારતમાં નોકરી કરી રહ્યા છે. કૉંગ્રેસ અલગ અલગ કટાક્ષ કરેલા ફોટો ટ્વિટ કરી રહ્યું છે, 1લી એપ્રિલના માધ્યમથી કૉંગ્રેસ ટ્વિટરનો સહારો લઈને ભાજપ સરકાર પર નિશાન સાધી રહ્યું છે.

વીડિયોમાં મોદી સરકારના સ્વચ્છ ભારત અભિયાનને નીરવ મોદી અને મેહુલ ચોક્સીના પીએનબી કૌભાંડ સાથે જોડવામાં આવી રહ્યું છે. વીડિયોમાં કહેવામાં આવ્યું છે કે મોદીનું સમર્થન કરતા નીરવ મોદી અને મેહુલ ચોક્સી પીએનબી બેંકના તમામ નાણા સાફ કરી નાખ્યા અને ઈનામ સ્વરૂપે તેમને વિદેશ યાત્રા મળી છે. કૉંગ્રેસે ગંગા સફાઈ અભિયાન પર કટાક્ષ કરતા કહ્યું છે કે ગંગા એટલી સાફ છે કે તમે ડૂબકી મારીને નરેંદ્ર મોદીની તસવીર જોઈ શકો છો.

કૉંગ્રેસના ટ્વિટર હેંડલ પરથી #HappyJumlaDivas હેશટેગ સાથે એક વીડિયો શેર કરવામાં આવ્યો છે જેમાં બ્રેકિંગ ન્યૂઝના નામથી નોટબંધીના મજાક કરતા કહેવામાં આવ્યું છે કે મોદીજીએ ભ્રષ્ટાચાર મુક્ત ભારત બનાવ્યું છે અને નોટબંધીથી ઘરની મહિલાઓ દ્વારા છુપાવવામાં આવેલું કાળુ નાણું બહાર લાવ્યા છે.