માત્ર પાણી જ નહીં સડક પર પણ ઉતરી શકે છે સી પ્લેન, જાણો વિશેષતા

ભારતમાં સૌથી પહેલું સી પ્લેન જલ હંસ અંદમાન-નિકોબાર આયલેન્ડ વચ્ચે શરૂ થયું હતું. 2010માં પ્રફુલ પટેલ નાગરિય ઉડ્ડયન મંત્રી હતા ત્યારે તેને લોન્ચ કરવામાં આવ્યું હતું.

વડાપ્રધાન નરેન્દ્ર મોદીએ આજે અમદાવાદમાં સાબરમતી નદીથી મહેસાણા જિલ્લામાં આવેલા ધરોઈ ડેમ સુધી સી-પ્લેનમાં સફર કરી. વડાપ્રધાન મોદીએ ભારતમાં કોઈ સી પ્લેનમાં સફર કરી હોય તેવો આ પ્રથમ મોકો છે. ભારત સરકાર નાના શહેરો અને ગ્રામીણ વિસ્તારોને જોડવા માટે સી પ્લેનનો વિકલ્પ લાવી રહી છે. સી પ્લેનની ખાસ વિશેષતા એ છે કે બે ફૂટ પાણીમાં પણ લેન્ડ કરી શકે છે. ઉપરાંત તેને ખેતર અને રોડમાં પણ સરળતાથી ઉતારી શકાય છે. મીડિયા રિપોર્ટ્સ મુજબ એક સી પ્લેનની કિંમત આશરે 25 કરોડ રૂપિયા છે.

હાલ માલદીવ અને ઓસ્ટ્રેલિયા જેવા દેશે તેમને ત્યાં આવતા ટૂરિસ્ટને સી પ્લેન દ્વારા ટ્રાવેલ કરવાની સુવિધા આપી રહ્યા છે.

સરકાર ઉડાન પ્રોજેક્ટ અંતર્ગત પ્રથમ તબક્કામાં 32 સ્થાન પર સી પ્લેન શરૂ કરવાની યોજના બનાવી રહી છે. જ્યારે બીજા તબક્કામાં 80 સ્થળોને આ યોજનામાં ઉમેરવામાં આવશે.

Quest kodiak 100 મોડલનું સી પ્લેન 300 મીટરના રન વે પરથી ટેક ઓફ કરી શકે છે. તેનું વજન 700 કિલો છે, જ્યારે તેનીક્ષમતા 1100 કિલો છે.

સ્પાઇસ જેટ જાપાનની સેતોચી હોલ્ડિંગ્સ સાથે મળીને 10 અને 12 સીટોના પાણી અને જમીન પર ઉતરી શકે તેવા પ્લેનનું ટ્રાયલ લઇ રહી છે. તાજેતરમાં જ મુંબઇની ગિરગાંવ ચોપાટી પર સી પ્લેનનું ટ્રાયલ લેવાયું હતું. સ્પાઇસ જેટ જાપાન પાસેથી 100 સી પ્લેન ખરીદશે.