‘મોદીને બોમ્બથી ફૂંકી માર, 50 કરોડ આપીશું’, ગુજરાતી ટોનમાં બોલતી વ્યક્તિએ યુવકને ફોન પર કરી ઓફર, જાણો વિગત

નવી દિલ્હીઃ મધ્યપ્રદેશના સતના જિલ્લા નિવાસી કુશલ સોની નામના યુવક પર વિદેશના અજાણ્યા નંબરથી ફોન આવ્યો હતો અને તેમાં તેને વડાપ્રધાન નરેન્દ્ર મોદીને ઉડાવી દેવાના બદલામાં 50 કરોડ રૂપિયા આપવાની ઓફર કરાઈ હતી તેવો દાવો સોનીએ કર્યો છે. કુશલ સોનીએ આ અંગે પોલીસ સ્ટેશનમાં લેખિત ફરિયાદ નોંધાવી છે.

ફોન કરનારે એવું કહ્યું હતું કે, 25 મેના રોજ મુંબઇમાં રેલી યોજાવાની છે અને તેમાં નરેન્દ્ર મોદી હાજરી આપવાના છે. આ રેલી દરમિયાન પીએમ મોદીને બોંબથી ફૂકી મારવા બદલ તને પ૦ કરોડ રૂપિયા મળી જશે. ફોન કરનારે એમ પણ જણાવ્યુ હતુ કે, આ ઘટનાને અંજામ આપવા માટે બે શખ્સોને તૈયાર પણ કરાયા છે.

ફોન કરનાર શખ્સએ કુશલ સોનીને જણાવ્યુ હતુ કે, આ ઘટનાને અંજામ આપવામાં તમે પણ સામેલ થઇ જાવ. તમને આ માટે મોં માંગી રકમ પણ આપવામાં આવશે. જો કે ફોન કરનારે પોતાનુ નામ જણાવ્યું ન હતું. શનિવારે સાંજે 4.50 કલાકે સતનાના રામનગર નિવાસી કુશલ સોનીને આ ફોન આવ્યો હતો.

પહેલાં તો કુશલ સોનીએ વિચાર્યુ કે કોઇ મજાક કરી રહ્યુ છે પણ મોબાઇલ નંબર જોયા બાદ તે ચોંકી ઉઠયો હતો અને તેણે વાતચીતનો ઓડીયો પણ પોલીસને સુપ્રત કર્યો છે. રામનગરના પોલીસ પ્રભારી મિશ્રાએ જણાવ્યુ છે કે આ ફોન વિદેશથી આવ્યો હતો. ફોન કરનાર શખ્સનો ટોન ગુજરાતી લાગતો હતો. ફોન આવ્યો તેનો નંબર આઠ અંકનો છે.

તાજેતરમાં જ સતનાના બલરામ અને રાજીવ નામના બે પાકિસ્તાની જાસૂસોને ભોપાલ એસટીએફએ ઝડપી લીધા હતા. આ પહેલાં મધ્ય પ્રદેશ ઇન્ટેલીજન્સે યુપી પોલીસને એલર્ટ કરી હતી કે ત્રાસવાદીઓ ભગવા પહેરવેશમાં યુપીના મુખ્યમંત્રી યોગી આદિત્યનાથ ઉપર હુમલો કરવાની તૈયારીમાં છે. સાઇબર સેલે તપાસ શરૂ કરી છે.